दाङ । तुलसीपुर उपमहानगरपालिका–७ का विनोद नेपालीले बुधबार घोराहीको यात्रा गरे । तुलसीपुरबाट बिहान करिब ७ बजे मोटरसाइकलमा हिँडेका उनी पत्रेखोलामा पुगेपछि केही बेर रोकिनुपर्‍यो ।

खोलामा पानीको बहाव बढेको देखेपछि केही समय रोकिए । तर, केही उपाय नलागेपछि खोला तर्ने विचार गरे । खोलाको बीचमा पुगेपछि मोटरसाइकल रोकियो । लामो प्रयासपछि मोटरसाइकल त पार लगाए, तर उनीसँग भएको मोबाइललगायत सामग्रीमा पानी पर्‍यो ।

“घोराही जानैपर्ने भएका कारण पानी परिरहेकै बीचमा यात्रा तय गरेँ, तर खोलामा पुल नहुँदा निकै सास्ती भोग्नुप¥यो,” उनले भने, “यो पुल बन्ने कुरा त हामीलाई एकादेशको कथाजस्तै लाग्न थालेको छ ।”

दंगीशरण गाउँपालिका–२ का विशाल चौधरीले बुधबार पत्रेखोलामा आएको बाढीका कारण मोटरसाइकल खोला पार गराउन १०० रूपैयाँ खर्च गरे । घोराहीबाट घर फर्किने बेलामा पनि फेरि १०० रूपैयाँ बुझाए । पुल नहुँदा उनले खोलामा मोटरसाइकल पार लगाउनकै लागि रकम खर्चनुपर्‍यो ।

उनले भने, “घोराही–तुलसीपुरको यात्रा गर्दा निकै सोच्नुपर्ने हुन्छ, हामीलाई यो दुःखकष्ट कहिलेसम्म होला कुन्नि ?”

पत्रेखोलामा पुल निर्माण सुरु गरिएको करिब एक दशक पुग्नै लाग्दा पनि निर्माणकार्य सम्पन्न हुनसकेको छैन । तुलसीपुर–घोराही सडकखण्डअन्तर्गत पर्ने पत्रेखोलामा आर्थिक वर्ष २०७१/०७२ देखि पुल निर्माण थालिएको हो । तर, पुलले अझै पूर्णता पाउन सकेको छैन ।

तत्कालीन अवस्थामा पुलको डिजाइन नमिलेको भन्दै निर्माण रोकिएको थियो । पुलको दायाँ–बायाँ पिलर निर्माण हुने समयमा डिजाइन नमिलेको कारण देखाउँदै निर्माण हुनसकेको थिएन । निर्माण रोकिएपछि नागरिकले सास्ती पाउँदै आएकोमा मन्त्रिपरिषद्को बैठकबाट पुललाई यसै वर्षभित्र पूर्णता दिने निर्णय भएको छ । मन्त्रिपरिषद्को निर्णयपछि नयाँ डिजाइनानुसार निर्माणको काम थालिएको छ ।

पछिल्लोपटक पुल निर्माणकार्य चालु आर्थिक वर्षमा सक्नुपर्ने थियो । तर, यस वर्ष पनि कोरोना महामारीका कारण अवधि लम्बिने निश्चित भएको सडक डिभिजन कार्यालय दाङका प्रमुख निरज शाक्यले बताए ।

“ठेकेदारले समयमै काम सम्पन्न गरेको भए यस वर्ष त सकिन्थ्यो, तीन महिनाको काम थियो । तर, अहिले पनि समयमा काम हुन सकेन । अहिले त झन् वर्षा पनि सुरु भइसक्यो,” उनले भने, “कोरोना महामारीका कारण सरकारले नै सम्झौता म्याद थप्ने भनिसकेकाले अब अर्को वर्ष जाने निश्चित भयो ।”

विभिन्न कारणले ६ वर्षसम्म पिलर पनि ठडिन नसकेको अवस्थामा अब करिब अन्तिम चरणमा पुगेको तर यसै आर्थिक वर्षमा भने नसकिने उनले बताए । “निर्माणको काम अन्तिम चरणमा पुगेको छ । वरपरको वाल बनाउनबाहेक अरू काम लगभग सकिएको छ,” उनले भने । पुल ४० मिटर लम्बाइ र ११ मिटर चौडाइको हुने कार्यालय प्रमुख शाक्यले जानकारी दिए ।