काठमाडौं । कोरोना संक्रमणका कारण हुम्लामा दोस्रो पटक एकजना पुरुषको मृत्यु भएको छ । कोरोना संक्रमणका कारण संर्केगाड गाउँपालिका वडा नम्बर २ रिपका टोप्ले बिकको मृत्यु भएको जिल्ला प्रशासन कार्यालयले जनाएको छ ।

संक्रमितको उपचार गाउँमा सम्भव नभएकाले जिल्ला अस्पताल हुम्ला सिमिकोट लैजाने क्रममा बाटोमै मृत्यु भएको हो । 

जिल्ला प्रशासन कार्यालय हुम्लाका प्रमुख जिल्ला अधिकारी गणेश आचार्यले सर्केगाड गाउँपालिकाको स्वास्थ्य चौकीमा उपचार गर्न सम्भव नभएपछि जिल्ला अस्पताल लैजाने क्रममा बिकको मृत्यु भएको जानकारी दिए । उनकाअनुसार उपचार गर्न स्टेचरमा बोकेर जिल्ला अस्पताल सिमकोट लैजाने क्रममा सर्केगाड गाउँपालिका दुल्ली कुनामा मृत्यु भएको हो । 

अहिले उनको शव कसरी व्यवस्थापन गर्ने भन्ने विषयमा छलफल भइरहेको उनले बताए । ‘‘उनको शवको व्यवस्थापन आफन्तले नै गर्ने कि नेपाली सेनाले भन्ने बिषयमा छलफल भइरहेको छ । यसका लागि सर्केगाड गाउँपालिकाका अध्यक्ष कृष्ण रोकायासँग समन्वय भइरहेको छ । शव व्यवस्थापनको लागि सेना घटनास्थलमा पुग्न दुईदिन लाग्नेछ,” प्रजिअ आचार्यले भने ।

एकसाता अघि बिकमा कोरोना पुष्टि भएको थियो । उनी दमबाट ग्रसित थिए । सर्केगाड गाउँपालिकाका अध्यक्ष करुण रोकायाका अनुसार सर्केगाडको स्वास्थ्य चौकीमा उपचार सम्भव नभएको जानकारी दिए । उनले सवारी साधन चल्ने बाटो नहुँदा संक्रमितले बिच बाटोमै ज्यान गुमाएको बताए । 

हुम्ला प्रहरी प्रमुख डिएसपी हेरम्भ शर्माले बिकलाई उपचारका लागि हेलिकप्टरको व्यवस्था मिलाउन खोजेको तर रकम अपुग भएकाले व्यवस्था गर्न नसकिएको बताए । उनकाअनुुसार हेलिकप्टरबाट लैजान रकमको जोहो हुन नसक्दा स्टेचरमै जिल्ला अस्पताल हुम्ला लैजान खोज्दा मृत्यु भएको हो । ‘‘हेलिकप्टरका लागि धेरै प्रयास भएको हो । तर ९ लाख ५० हजार रकम पहिला जम्मा नगरे हेलिकप्टर आउन नमान्ने अवस्था आयो,” उनले भने । 

यसअघि कर्णाली प्रदेशले हुम्ला, मुगु, डोल्पा लगायतका जिल्लामा  कोरोना संक्रमितलाई गम्भीर समस्या आए हेलिकप्टरद्वारा उद्धार गरेर उपचार गरिने घोषणा गरेको थियो । कर्णाली स्वास्थ्य विज्ञान प्रतिष्ठान जुम्ला र सुर्खेत अस्पतालमा उपचार गर्नेगरी उक्त घोषणा गरेको थियो । 

अहिले गाउँपालिका र प्रदेश सरकार संक्रमितको उपचार गर्न छुट्याइएको रकम कागजमै सीमित देखिएको छ ।