जनकपुरधाम । प्रदेश नम्बर–२ मा आगामी आर्थिक वर्षको बजेट बनाउन सरकारी अधिकारीहरु व्यस्त छन् । आर्थिक वर्ष ०७८/७९ को बजेटको तयारी भइरहेको हो ।

आर्थिक मामिला तथा योजना मन्त्रालयका सचिव काशीराज दहालले बजेटको आकार घट्न सक्ने आँकलन गरे । बन्दाबन्दीले राजस्व संकलनमा गिरावट आएको र केन्द्रमै सरकारले बजेट घटाएर ल्याएको हुनाले प्रदेशमा पनि बजेटको अकार घट्ने उनको भनाइ छ ।

“लक्ष्यानुसार राजस्व संकलन हुनसकेको छैन,” उनले भने, “केन्द्रमा पनि सरकारले बजेटको आकार घटाएको छ । त्यसकारण यहाँ पनि बजेटको आकार घट्न सक्छ ।”

आर्थिक मामिला तथा योजनामन्त्री विजयकुमार यादव बजेट चालु वर्षकै हाराहारीमा आउन सक्ने बताउँछन् । ‘आन्तरिक ऋण असुलीको अवस्था हेरेर मात्र बजेटको आकार फाइनल हुनेछ,” उनले भने, “बजेट ठ्याक्कै फाइनल त भएको छैन । तर, आकार बढ्ने स्थिति कमै देखिन्छ ।”

कोरोना महामारी नियन्त्रण एवं व्यवस्थापनमा केन्द्रित रहेर बजेट ल्याउने तयारी भइरहेको उनले बताए । विकास निर्माणको बजेट विगतभन्दा कम आउने भन्दै स्वास्थ्य, शिक्षा, कृषि र रोजगारीलाई प्राथमिकतामा राखिएको उनले जानकारी दिए ।

नीति तथा योजना आयोगका उपाध्यक्ष भोगेन्द्र झाले जेठ अन्तिम साता नीति तथा कार्यक्रम ल्याउने तयारी भइरहेको बताए । बजेटमा हरेक पक्षलाई समेटन युद्धस्तरमा काम भइरहेको भन्दै प्रदेशसभामा बजेट अधिवेशनको पहिलो बैठकमै नीति तथा कार्यक्रम प्रस्तुत हुने उनले जानकारी दिए ।

नीति तथा कार्यक्रममा आर्थिक, सामाजिक र स्वास्थ्यजस्ता विषयमा महत्तवपूर्ण योजना समावेश गरिएको जनाइएको छ । विकास निर्माणमा आधारित भएर बजेट नबन्ने र बजेटको आकार घट्ने झाको भनाइ छ ।