काठमाडौं । सरकारले आजदेखि खाद्यान्न पसल बन्द गरी निषेधाज्ञामा कडाइ गरेको छ । प्रशासनले निषेधाज्ञा उल्लङ्घन गरिए एक वर्ष कैद र पाँच लाख जरिबाना गर्ने चेतावनी दिइरहेको छ । कोरोना महामारीका कारण अप्ठेरोमा परेका सर्वसाधरणलाई निषेधाज्ञाले झन् पीडा दिइरहेको छ । त्यसमाथि विपन्नका लागि निषेधाज्ञाले पीडामाथि पीडा थपेको छ । 

उपत्यकामा कडा निषेधाज्ञा लागु भएकै दिन शुक्रबार काठमाडौं महानगरपालिकाका मेयर विद्यासुन्दर शाक्यले उपत्यकावासीका नाममा सम्बोधन गरे । तर, सम्बोधनका क्रममा मेयर शाक्यले दैनिकजसो तीनसयको हाराहारीमा खाना खुवाइरहेका मनकारीहरूलाई भने नमिठो सम्बोधन गरे । 

‘‘निषेधाज्ञाको समयमा केही कुरा पनि आएका छन् । लामो समय भयो विपन्नलाई खानाको असहज होला कि ? यसलाई म सहज स्थिति मान्दिन । सबैको स्थिति एउटै पनि छैन् । यस्तो समयमा विभिन्न संघसस्थाले हामी निशुल्क खाना वितरण गर्ने भन्दै महानगरमा सम्झौता गर्न आएका छन् । हामीले उहाँहरूलाई के भनेका छौँ भने तपाईंहरूले गर्न सक्नुहुन्छ, निशुल्क खाना वितरण गर्न पाउनुहुन्छ । त्यसका लागि हरेक वडामा वान टु वान सम्पर्कमा गरौँ । तर विपन्नमाथि वितरण गरिएको खाना सामाजिक सञ्जालमा पोस्ट गरेर मानवीय संवेदनामा चोट नपुगोस्,” मेयर शाक्यले सम्बोधनका क्रममा भने । 

मेयर शाक्यले २२ मिनेट लामो भाषणका क्रममा महामारीमा निशुल्क खाना खुवाउनेहरूलाई लक्षित गरेर गरेको सम्बोधन उनकै शब्दमा :

सामाजिक दाताले विपन्नलाई एक छाक खाना खुवाएर फेसबुकमा हाल्ने, सानो एउटा प्यााकेट दिने दशवटा समाचारको पात्र बन्दिने, फोटो पत्रपत्रिकामा छापिँदा भोलि उहाँहरू आफैँलाई ग्लानी महसुस नहोस् । एक छाक खाना नपाएको त्यो भोकले भन्दा उसलाई त्यो फोटोले असर नपारोस् । विशुद्ध धर्मचित्तले काम गरौँ । पछिल्लो समय आफू चर्चा कमाउनका लागि समाचार आइरहेका छन् । कतै कतै गर्दा गर्दै त्यस्तो समस्या भयो भने महानगरपालिका हाम्रो ३२ वटा वडा कार्यालयहरूका वडाध्यक्ष वा वडा सदस्यहरूमार्फत हामीले उहाँहरूलाई घरघरमा खाद्यान्न पुर्‍याउने भनेका छौँ । 

सार्वजनिक ठाउँमा बोटोमा राखेर सबैले देख्ने गरी र दश जनालाई खाना खुवाएर १०० जना पत्रकारलाई जम्मा गरेर खुवाउनुपर्ने बाध्यात्मक छैन । कसैले नदेख्नेगरी सुटुक्क खाना वितरण गर्दा सबैभन्दा राम्रो हुन्छ । त्यसलाई काठमाडौं महानगरपालिका प्रोत्साहन गर्न पनि चाहन्छ । त्यस्तो काम गर्न कसैलाई सहयोग चाहिन्छ भने काठमाडौं महानगरपालिका सहयोग गर्न पनि तयार छ । कुनै पनि संघसस्थाले हामीले काम गरेका छौँ । हामी सित्तैमा खाना खुवाउन चाहन्छौँ । भोलुन्टियर संख्या पनि घट्ने भो । मासमा राखेर खाना खुवाउँदा संक्रमितको संख्या बढ्न पनि सक्ने भो । घरबाट निस्कन नपर्नेगरी घर–घरमा व्यवस्थापन गर्छौँ । र त्यसका लागतसहित आयो भने महानगरपालिका हामी आफैँ पनि व्यवस्थापन गर्न तयार छौँ । 

सामाजिक भावनाले काम गरिरहेको संघ संस्था छ भने उहाँहरूलाई सहकार्य गरेर सहयोग गर्न तयार छौँ । यसरी कोरोनासँग लड्नलाई हामी सबै जुटौँ । एकले अर्कालाई केही गरेन भनेर दोष दिएर मुक्त हुन सक्दैनौँ।