काठमाडौं । साबिक विजेता लिभरपुलले इंग्लिस प्रिमियर लिग फुटबलमा रोमाञ्चक जित हासिल गरेको छ । खेलको इन्ज्युरी समयमा गोलरक्षक एलिसन बेकरले गोल गर्दा लिभरपुलले महत्वपूर्ण ३ अंक जोडेको हो ।

आइतबार राति भएको खेलमा लिभरपुलले वेस्ट ब्रुमलाई २–१ ले पराजित गर्‍यो । वेस्ट ब्रुमले लिएको अग्रतालाई उल्टाउँदै लिभरपुल विजयी भएको हो ।

खेलको १५औँ मिनेटमा रोबिन्सन कानुले गोल गर्दै वेस्ट ब्रुमलाई अग्रता दिलाए । लिभरपुलका लागि खेलको ३३औँ मिनेटमा मोहमद सलाहले बराबरी गोल फर्काए । खेलको इन्ज्युरी समयमा एलिसनले गोल गर्दै टिमलाई २–१ को जित दिलाए ।

जितसँगै लिभरपुलले च्याम्पियन्स लिगको अघिल्लो चरण प्रवेशका लागि आफ्नो सम्भावना बलियो बनाएको छ । लिगमा ३६ खेल खेलेको लिभरपुलको ६३ अंक छ । लिभरपुल तालिकाको पाँचौँ स्थानमा छ । पराजित वेस्ट ब्रुम २६ अंकसहित तालिकाको १९औँ स्थानमा छ ।