काठमाडौं । प्रधानमन्त्री केपी शर्मा ओलीले नेपालीको शरीरमा रोग प्रतिरोधात्मक क्षमता बलियो भएकाले कोभिड–१९ को संक्रमण यो तहमा बढ्दा भन्ने आफूले नसोचेको बताएका छन् । 

शनिबार बालुवाटारमा निजी क्षेत्र र सरोकारवालसँग भएको छलफलमा प्रधानमन्त्री ओलीले यस्तो  संक्रमण यो तहसम्म बढ्ला भन्ने नलागेको बताएका हुन् । 

“यस रूपमा नेपालमा कोभिड बढ्छ भन्ने मैले ठानेको थिइन । मैले के  ठानेको थियो भनेदेखि हाम्रो इम्युन सिस्टम धेरै स्ट्रोङ छ त्यसकारण अलिअलि सर्ला तर यस तहमा वृद्धि हुन सक्दैन भन्ने लागेको थियो,” उनले भनेका थिए ।  

प्रधानमन्त्री ओलीले इम्युन सिस्टमको भूमिका नै नहुने भन्ने चाहिँ नभएको बताए ।

संक्रमणमुक्त भएका मानिसहरू इम्युन सिस्टमको भूमिका भने रहेको उनको भनाइ छ । 

गत वर्षको संसद्को एक बैठकमा प्रधाननमन्त्री ओलीले नेपालीको इम्युनिटी पावर बलियो भएकाले कोभिडले खासै असर गर्न नसक्ने जिकिर गरेका त्यही विषयमा नेपाली कांग्रेसका सांसद गगन थापा र प्रधानमन्त्री ओलीबीच संसद्मा सवाल–जवाफ भएको थियो । 

शनिबारको बैठकमा ओलीले नाकमा, थ्रोटबाट स्रकमण हुने भए त्यहीबाट खत्तम पार्नुपर्ने र त्यसको उपाय खोज्नुपर्ने बताए । अक्सिजन लगाउनुपर्ने, भेन्टिलेटर लगाउनुपर्ने अवस्थामा संक्रमित नपुगोस भन्नेमा ध्यान दिनुपर्ने उनको भनाइ छ । साथै ओलीले आयुर्वेदिक उपचार पद्धतिमा पनि ध्यान दिनुपर्ने बताए ।