काठमाडौं । कोरोना संक्रमण पुष्टि भएपछि अभिनेत्री वर्षा राउत अहिले होम आइसोलेसनमा छिन् । उनले इन्स्टाग्राम स्टोरीमार्फत यस्तो जानकारी दिएकी हुन् ।

कोरोनालाई पराजित गर्न सुप, तातो पानी र भिटामिनहरुको सहारा लिइरहेको उनले जनाएकी छिन् । कोरोनाविरुद्धको खोपको पहिलो डोज लगाएकी उनलाई ज्वारो आउने, जिउ दुख्नेजस्ता लक्षण देखिएको छैन । तर, हल्का रुघाखोकी र स्वाद हराएको वर्षाले जानकारी गराएकी छिन् ।

गाह्रो नभए पनि लापरबाही गर्न नहुने उनले उल्लेख गरेकी छन् । “मलाई त्यस्तो गाह्रो भइरहेको छैन । तर, त्यसो भन्दैमा लापरबाही गरेर हिँड्नु हुँदैन । मैले धेरै खराब केसहरु पनि देखेको छु । त्यसैले तपाईंहरु पनि घरमै बस्नुहोस्, आफ्नो ख्याल राख्नुहोस् ।”

यस्तै, वर्षाले कोरोना निको भएपछि प्लाजमा दान गर्ने घोषणा पनि गरेकी छिन् । कोरोनालाई हराइसकेका अरुहरुलाई पनि प्लाजमा दान गर्न उनले अनुरोध गरेकी छिन् ।