दाङ । नेकपा एमालेको तर्फबाट दाङको निर्वाचन क्षेत्र नं. २ (ख) बाट प्रदेशसभा सदस्यमा निर्वाचित अमरबहादुर डाँगी नेकपा माओवादी केन्द्रको पक्षमा उभिएका छन् ।

प्रदेशसभा सदस्य डाँगीले नेपाली कांग्रेस, माओवादी केन्द्र, राष्ट्रिय जनता पार्टी र राष्ट्रिय जनमोर्चासहितका चार दलीय गठबन्धको क्याम्पमा पुगेपछि मुख्यमन्त्री शंकर पोखरेललाई राजनीतिक रूपमा थप समस्या उत्पन्न हुने देखिएको छ ।

माओवादी केन्द्रकी सांसद तथा प्रदेश मामिला तथा कानुन समितिकी सभापति दामा शर्माले सांसद डाँगी मुख्यमन्त्रीको अलोकतान्त्रिक र असंवैधानिक कदमकाविरुद्ध चार दलीय गठबन्धनमा उभिएको बताइन् । शर्माले तीनदिन अगाडि नै सांसद डाँगी आफुहरूसँगै प्रदेश प्रमुखको कार्यकक्ष घेराउ कार्यक्रममासमेत सहभागी भएर आफुहरूको कित्तामा उभिएको दाबी गरिन् ।

 "माननिय डाँगीलाईसमेत गनेर हामीले ४३ सदस्यकाे हस्ताक्षर बुझाएका थियौँ," शर्माले भनिन् ।

यसघि उनी एमाले भित्र माधबकुमार नेपाल पक्षधर मानिन्थे । उनी घोराही उपमहानगरपालिकाका पूर्व मेयर पनि हुन ।