बोगटा । दक्षिण अमेरिकी देश कोलम्बियामा सरकारले प्रस्ताव गरेको करको विरोध गर्दै हजारौँ नागरिक प्रदर्शनमा उत्रिएका छन् । कोरोनाभाइरस महामारीबीच बुधबार राष्ट्रपति आइभान ड्युकको सरकारले कर वृद्धि गरेपछि नागरिक प्रदर्शनमा उत्रिएका अलजजिराले जनाएको छ ।

प्रदर्शनमा विद्यार्थी, शिक्षक, ट्रेड युनियनलगायत अन्य राष्ट्रिय र स्थानीय संघ–संस्थाले सहभागिता जनाएका छन् । यहाँको सरकारले कोरोनाको मारमा परेको अर्थतन्त्रमा सुधार गर्न भन्दै नागरिकलाई लगाएको कर थप गरेर ठूला लगानीकर्तालाई कर छुट दिने प्रस्ताव गरेको छ । तर, यसबाट न्यून र मध्यम आय भएका नागरिक थप समस्यामा पर्ने निश्चित छ ।

“हामी कर पुनरवलोकनको प्रस्तावलाई अस्वीकार गर्न प्रदर्शनमा सामेल भएका हौँ,” प्रदर्शनमा सहभागी एक शिक्षकले भने, “धनीलाई सबै सुविधा दिइरहँदा सरकार हामी गरिबलाई लुटिरहेको छ ।” सरकारले आफूहरुको माग सम्बोधन नगरे प्रदर्शन जारी राख्ने प्रदर्शनकारीहरुले बताएका छन् ।

बोगटा, मेडिलिन, क्यालीलगायत अधिकांश सहरमा प्रदर्शन भएको हो । प्रदर्शनकारीमाथि प्रहरीले पानीको फोहोरा र टियर ग्यास प्रहार गरेको जनाइएको छ । सरकारले देशको साधन–स्रोत बहुराष्ट्रिय कम्पनीलाई सुम्पेको भन्दै उनीहरुले सरकार माफिया बनेको आरोप लगाएका छन् ।

सन् २०१६ मा विद्रोही समूह रिभोलुसनरी आर्मड फोर्सेज अफ कोलम्बियासँग सम्झौता भएपश्चात यहाँ ५० वर्षे लामो संघर्षको अन्त्य भएको थियो । यद्यपि, यहाँ अन्य धेरै आपराधिक समूह सक्रिय छ ।