इस्लामावाद । पाकिस्तानका विदेशमन्त्री शाह महमुद कुरैशीले पाकिस्तान र भारतबीच गोप्य वार्ता भएको खबरको खन्डन गरेका छन् । टर्कीको टीआरटीवर्ल्ड टेलिभिजनसँगको अन्तर्वार्तामा उनले दुई देशबीच कुनै ‘ब्याकडोर च्यानल’बाट वार्ता नभएको स्पष्ट पारेका हुन् ।

“भारतसँग हाम्रो कुनै कुराकानी भएको छैन । न त संयुक्त अरब इमिरेट्स (यूएई)ले कुनै वार्ता गर्न मध्यस्थता गरेको छ,” उनले भने । केही दिनअघि मात्र यूएईको मध्यस्थतामा भारत र पाकिस्तानबीच गोप्य रुपमा छलफल भइरहेको समाचारहरु आएका थिए ।

पाकिस्तान वार्ताका लागि सधैँ तयार रहेको भन्दै कुरैशीले भारत सधैँ वार्ताबाट पर भाग्दै आएको आरोप लगाए । आफ्नो आर्थिक विकासका लागि पाकिस्तानले पूर्व र पश्चिमा सबै देशसँग सुमधुर सम्बन्ध बनाउन चाहेको भन्दै उनले भारतले उक्साउने किसिमका कदम चाल्दै आएको जिकिर गरे ।

“पाकिस्तान वार्ताका लागि तयार छ । यसका लागि भारतले आफ्नो कश्मिर नीतिमा पुनर्विचार गर्नुपर्छ,” कुरैशीले भने । यस क्षेत्रमा कुनै पनि चरमपन्थी समूहले कब्जा नगरून् भन्ने आफूहरुको मुख्य चासो रहेको भन्दै उनले आफूहरु वार्ताका लागि तयार रहेको बताएका हुन् ।