काठमाडौं । मेलम्चीबाट प्राप्त हुने पानी काठमाडांै उपत्यकाको विभिन्न क्षेत्रमा वितरण गर्न आवश्यक वितरण सञ्जाल स्थापनाका लागि आयोजना कार्यान्वयन निर्देशनालय (पीआईडी) र निर्माण व्यवसायीबीच मंगलबार सम्झौता भएको छ । 

निर्देशनालयले यसअघि विस्तार गरेको ६७० किलोमिटर लामो वितरण सञ्जालले समेट्न नसकेका उपत्यकाको चक्रपथ भित्रका विभिन्न भागमा नयाँ वितरण प्रणाली स्थापना गर्ने उद्देश्यले यो सम्झौता भएको हो । वितरण सञ्जाल सुधार प्याकेज ४ अन्तर्गत निर्देशनालयले पाटन मंगलबजार, सानेपा, खुुसीबु नयाँबजार, कलंकी तथा टेकुमा नयाँ वितरण प्रणाली स्थापना गर्न लागेको हो । 

एसियाली विकास बैंक (एडीबी) को ऋण सहयोग अन्तर्गत निर्माण गरिने नयाँ वितरण सञ्जालको लम्बाई २२९ किलोमिटर हुनेछ । वितरण सञ्जालको कार्य तत्कालै सुरु गरी आगामी ३० महिनाभित्रमा सम्पन्न गर्ने लक्ष्य लिएका पीआईडीका प्रवक्ता लीलाप्रसाद ढकालले जानकारी दिए । 

उनकाअनुसार २ अर्ब ६२ करोड ४९ लाख रुपैयाँ लागतमा निर्माण हुने वितरण सञ्जाल विस्तारको जिम्मेवारी चीनको गोन्झाओ इन्टरनेशनल इकोनोमिक एन्ड टेक्निकल कोअपरेशन (जीआईईटीसी) तथा नेपाली साझेदार शर्मा एण्ड कम्पनी र रमण कन्स्ट्रक्सन सम्मिलित संयुक्त उपक्रमले प्राप्त गरेका छन् । 
सम्झौतापत्रमा मंगलबार पीआईडीका निर्देशक तिरेशप्रसाद खत्री र जेभीका आधिकारीक प्रतिनिधि रमन कन्स्ट्रक्सनका निर्देशक पवन महतोसहित जेभीका प्रतिनिधिले हस्ताक्षर गरेका छन् ।  
सम्झौता अनुसार २२९ किलोमिटर पाइपलाइन विस्तारको कार्यसँगै निर्माण पक्षले ती क्षेत्रका ३२ हजार घरधुरीमा नयाँ प्रणालीमा आधारित धाराहरुको जडान गर्नुपर्नेछ । त्यसैगरी खनिएका सडकहरु सम्झौतामा उल्लेखित सर्तहरुको अधीनमा रही पुनस्र्थापनाको कार्य पनि गर्नुपर्नेछ ।