काठमाडौं । नेपाल कम्युनिस्ट पार्टी (नेकपा) प्रचण्ड–नेपाल समूहले बुधबार राजधानीमा शक्ति प्रदर्शन गरेको छ । प्रदर्शनका कारण बिहानैदेखि काठमाडौंको ट्राफिक व्यवस्था प्रभावित भयो ।

आज बिहान ९ बजेदेखि काठमाडौंका विभिन्न स्थानमा सार्वजनिक सवारी अवरुद्ध हुँदा विद्यार्थी, कर्मचारी, मजदुरलगायत आमसर्वसाधारण मर्कामा परे । सर्वसाधारण हिँडेरै आफ्नो गन्तव्यतिर लागेका थिए । दैनिकजसो हुने शक्ति प्रदर्शनले गर्दा आफूहरुले सास्ती खेप्नुपरेको सर्वसाधारण बताउँछन् ।

एक वर्षको छोरा बोकेर रत्नपार्कतिर जान लागेकी बनेपाकी सञ्जीवनी कामी गौशालामा अलपत्र थिइन् । ‘‘हामी निमुखाहरुको आवाजचाँहि कसले उठाइदिने ?,” उनले प्रश्न गरिन् । गौशालामा बस्ने उनी रत्नपार्कको फुटपाथमा चुरापोते बेचेर दुईजना छोराछोरीलाई पाल्दै आएको बताउँछिन् ।

‘‘म एक्लै भए पनि भोकै सुत्न हुन्थ्यो, तीनजनाको परिवारलाई चुरापोते बेचेर बेलुका खुवाउनुपर्छ । दिनभरको कमाइले बिहान–बेलुकाको छाक टार्नुपर्छ,’’ उनले थपिन्, ‘‘बिहान–बेलुका के खाउँ, के लाउँ हुन थालिसक्यो । हिँड्डुल हुन नदिएपछि खाना नपाउने अवस्था आउन लागेको छ । कसरी बाँच्ने सहरका गरिब ?”

ट्याक्सीमा चर्को असुली !
चाबहिलको पशुपति बहुमुखी क्याम्पसमा कक्षा–१२ मा पढ्ने मेनुका विकले कलेजदेखि कोठामा जान खोज्दा गौशालामै रोकिएको बताइन् । नयाँ बानेश्वरमा कोठा लिएर बसेकी उनी भन्छिन्, ‘‘सार्वजनिक यातायात निषेध गरेका बेला ट्याक्सीमा जान खोज्दा ट्याक्सीको भाडा ५०० मुनि कसैले भन्दैनन् । अब यस्तो अवस्थामा गौशालादेखि हिँडेरै नयाँ बानेश्वर पुग्नुपरेको छ । आम्दानीको स्रोत केही पनि छैन । बुवा–आमाले दुःख गरेर पठाइदिएको रुपैयाँ पनि यसरी नै सकिएर जान्छ । हामी जस्ता गाउँबाट आएका विद्यार्थीलाई राजधानीमा राम्रोसँग पढ्ने वातावरण छैन ।”

केपी ओली र प्रचण्डले पालैपालो दुःख दिइरहेको चाबहिलको आकाशे पुलमाथि भेटिएका २४ वर्षीय दिलीप आचार्यको भनाइ थियो । ‘‘योभन्दा देशका युवालाई रोजगारी दिनु नि । होटेलमा पाएको काम पनि गुम्लाजस्तो भइसक्यो । यसरी नै होटेलमा जान पाइँदैन ।” निरन्तर यस्तै भइहँदा दैनिक खान–लाउन असहज हुँदै गएको उनको दुखेसो थियो ।

सार्वजनिक सवारीचालक पनि प्रदर्शनको मारमा पर्दै आएका छन् । एकातिर जानुपर्ने सवारी अर्कोतिर लैजानुपर्दा दोहोरो मार खेप्नुपरेको साँखु–कालीमाटी–कलंकी रुटमा गाडी चलाउँदै आएका देवेन्द्र लामा बताउँछन् । उनी आक्रोश पोख्दै भन्छन्, ‘‘गन्तव्यमा जान पाइँदैन, बेकार पेट्रोल मात्रै खर्च हुन्छ । सडकमा सभा गरेर हामीजस्तालाई भोकभाकै मार्न खोजका हुन्, यिनीहरुले ।”

ट्राफिक व्यवस्थापन अस्तव्यस्त
महानगरीय ट्राफिक प्रहरी महाशाखाका प्रमुख एसएसपी जनक भट्राई सडक सभाले राजधानीको ट्राफिक व्यवस्थापन अस्तव्यस्त पारेको बताउँछन् । ‘‘सडकमा सभा गर्दा राजधानीका पूरै सवारी प्रभावित हुन्छन् । दैनिक यसरी नै आन्दोेलन र हड्ताल हुने हो भने जनताको हालत के होला ? हामी त जनताका सेवक हौँ ।”

देशभर १० लाखको हाराहारीमा ठेला व्यापारी रहेको नेपाल स्वरोजगार व्यापार श्रमिक संघका अध्यक्ष कुमार सापकोटा बताउँछन् । उनले भने, ‘‘कोरोनाकालपछि विस्तारै माथि उठ्न कोसिस गर्दै थियौँ । विस्तारै स्वरोजगारउन्मुख हुँदै थियौँ । अहिले देशको हालत यस्तो छ, हाम्रो पीडा कसले बुझ्ने ?”