विराटनगर । गाउँबाट अवैध रुपमा ट्रकमा लोड गराएर ओसार-पसार गर्न ठिक्क पारिएका ६७ वटा गोरु बरामद गरिएको छ ।

मोरङको केराबारी गाउँपालिका ५, सतिसालेमा गोरु लोड गरेको ट्रक छ भन्ने खबर प्राप्त हुनसाथ इलाका प्रहरी कार्यालय केराबारीबाट खटिएको टोलीले ना.६ख ६१३२, ना.६ख ९७३४ र ना.५ख ७७५७ नम्बरको ट्रकमा ६७ वटा गोरु फेला पारेको हो ।
 
जिल्ला प्रहरी कार्यालय मोरङका प्रवक्ता लोकदर्शन थापाका अनुसार अनुसन्धानका क्रममा ती गोरू सिन्धुपाल्चोक घर भएका ठेकेदार विश्व बस्नेत भएको बुझिएको छ । थापाले भने, “निजले केराबारी गाउँपालिका ८ बस्ने डोरबहादुर विकलगायत नौजनाको व्यवसाय गर्दाको रकमसमेत नदिएको खुल्न आएको छ ।” ट्रक, चालक र गोरु नियन्त्रणमा लिई इप्रका बेलबारीमा ल्याई अनुसन्धानपछि आवश्यक कारबाहीका लागि राजस्व अनुसन्धान कार्यालय इटहरी पठाएको थापाले बताए ।