काठमाडौं । उखु उद्योग किसानलाई तिर्न बाँकी बक्यौता ८ करोड एक लाख रुपैयाँमा झरेको छ । गत वर्षको पुससम्म १ अर्ब ४० करोड रुपैयाँ रहेको बक्यौता रकम माघको पहिलो सातामा ८ करोड १ लाखमा पुगेको हो ।

सरकारले किसानलाई दुईपल्ट बक्यौता रकम दिलाइदिने प्रतिबद्धता गरेको थियो । गत पुसमा किसानको आन्दोलनताका ६५ अर्बमा आइपुगेको बक्यौता रकममध्ये २१ दिनमा ५७ रुपैयाँ उपलब्ध गराइएको हो ।

सरकारका अनुसार श्रीराम सुगर मिल्सको ३५ करोड रुपैयाँ बक्यौतामध्ये २१ दिनमा सबै भुक्तानी गरेको छ । यस्तै अन्नपूर्णले १७ करोडमध्ये १० लाख ८८ हजार भुक्तानी गरेको छ भने एक करोड ७६ लाख खातामा जम्मा गरेको छ ।

इन्दिरा सुगर मिल्सले चार करोड २० लाखमध्ये एक करोड ५० लाख रुपैयाँ भुक्तानी गरेको छ । लुम्बिनी चिनी उद्योगले आठ करोड ४१ लाखमध्ये पाँच करोड १६ लाख रुपैयाँ भुक्तानी गरेको छ । यसको तीन करोड रुपैयाँ रोक्का छ ।

महालक्ष्मी सुगर मिलले २० लाखमध्ये एक रुपैयाँ पनि भुक्तानी गरेको छैन । सबैभन्दा बढी बक्यौता कायम हुने अन्नपूर्ण र इन्दिरा हुन् । दुवै मिलका सञ्चालक एउटै व्यक्ति हुन् ।

उद्योग, वाणिज्य तथा आपूर्ति मन्त्रालयले किसान र उद्योगीको तथ्यांक फरकफरक रहेको पनि जनाएको छ । साथै बक्यौता उठाउन सम्पत्तिमा हस्तक्षेप पनि गर्ने नीति लिइने र किसानलाई बालीको मूल्य दिलाइ छाड्ने मन्त्रालयको प्रतिबद्धता छ ।