काठमाडौं । प्रमुख प्रतिपक्षी दल नेपाली कांग्रेसले भोलि सरकारविरुद्ध देशैभर प्रदर्शन गर्दैछ । संसदीय व्यवस्थामा प्रतिपक्षी दलले सरकारविरुद्ध सडकमा प्रदर्शन गर्नु अस्वाभाविक त मानिँदैन । तर, प्रतिपक्षी दलको प्राथमिकतामा भने सडकभन्दा संसद नै पर्नुपर्ने जानकारहरु बताउँछन् । संसदमा उठाएका आवाज पनि सरकारले नसुनेमा भने प्रतिपक्षी दल सडकमा जानुको औचित्य स्थापित हुने उनीहरुको टिप्पणी छ ।

तर, प्रमुख प्रतिपक्षी दल नेपाली कांग्रेसले सोमबार (भोलि) सरकारविरुद्ध सडकमा प्रदर्शन गर्दैछ । कतिपयले सरकारसँग जनता निराश भएकाले कांग्रेसको सडक प्रदर्शनलाई स्वाभाविक ठानेका छन् भने केहीले संसद बोलाउनका लागि चासो देखाउनुपर्ने भन्दै टिप्पणी गरेका छन् । उनीहरुले सामाजिक सञ्जालमा कांग्रेसले सडकमा होइन संसद बोलाउन दबाब दिनुपर्ने मत राखेका छन् । 

उसो त कांग्रेसको पदाधिकारी बैठकमा संसदको अधिवेशन आह्वानका लागि सरकारको ध्यानाकर्षण गराउने निर्णय नभएको होइन । तर, सरकारले नसुनेपछि एक तिहाइ हस्ताक्षर जुटाएर बैठक सञ्चालनका लागि राष्ट्रपतिसमक्ष अपिल गर्नसक्ने बाटो नभएको होइन । तर, सरकारले चासो नदेखाउँदा पनि कांग्रेसले मौनता साँधेको भन्दै आलोचना हुँदै आएको छ ।

राजनीतिशास्त्री प्रा.डा लोकराज बराल प्रतिपक्षी दलले केही गर्न सकेन भन्ने दबाबका कारण कांग्रेस सडकमा आउन लागेको बताउँछन् । 

“सरकारको काम निरासापूर्ण छ । प्रतिपक्षीलाई पनि केही गर्न सकेन भन्ने दबाब छ । यतिबेला सरकारको काम निरासापूर्ण भएको हुनाले प्रतिपक्षी दलले आफ्नो उपस्थिति जनाउन सडकमा आउन लागेको देखिन्छ,” उनले भने, “संसद नभए पनि जनताका समस्या शान्तिपूर्ण रुपमा प्रतिपक्षले बोल्नुपर्छ । संसद भए पनि, नभए पनि बेलाबेलामा सडकमा कुरा उठाउनुपर्छ ।”

सडकबाट शक्ति बटुल्दै संसद 

गत असार १८ गते अन्त्य भएको संसद अधिवेशन कहिलेबाट सुरू हुन्छ अझै मिति तय गरिएको छैन । संविधानमा एउटा अधिवेशन अन्त्य भएको ६ महिनाभित्र अर्को अधिवेशन सुरू भइसक्नुपर्ने व्यवस्था छ । संविधानको यो बाध्यकारी व्यवस्थाका कारण पुस १८ अघि नै संघीय संसदको अधिवेशन आह्वान हुने देखिन्छ । 

कोरोना महामारी, भ्रष्टाचार, अनियमितता, बलात्कारका घटना जुन रुपमा उठ्नुपर्ने थियो, संसद नहुँदा उठ्न नसकेको प्रतिपक्षी दल कांग्रेसकोसमेत स्वीकारोक्ति छ । तर, उसले संसदको माग भने सशक्त रुपमा गर्न सकेको छैन ।

सडक आन्दोलनमा आउन नागरिकलाई अपिल गर्दा भने कांग्रेसले पुनः संसद सम्झिएको छ ।  कांग्रेसले आइतबार जारी गरेको विज्ञप्तिमा सरकारविरुद्ध सडकदेखि संसदसम्म दबाब दिने चेतावनी दिइएको छ । 

“नेपाली जनताले लामो संघर्षबाट स्थापित गरेको संघीय, लोकतान्त्रिक गणतन्त्रमार्फत सार्थक परिणामको अपेक्षा जनताले राख्नु जनताको स्वभाविक हक हो । अतः नेपाली कांग्रेसले सडकदेखि संसदसम्म अब सरकारलाई तिब्र दबाब दिनु छ र जनताको वितृष्णालाई सम्बोधन गर्न संयम र सशक्त ढंगले अघि बढ्नुछ । त्यसकै शुरूवात हो भोलिको सांकेतिक प्रदर्शन,” कांग्रेसले भनेको छ । 

सभापति शेरबहादुर देउवाले सडकबाट शक्ति बटुलेर संसदमा कांग्रेस थप प्रभावकारी ढंगले अघि बढ्ने बताएका छन् । 

उनले भनेका छन्,“मुलुकलाई हरेक चुनौतीको घडीमा निकास र नेतृत्व दिएको दल हो नेपाली कांग्रेस । आज प्रतिपक्षमा रहेको समयमा पनि जिम्मेवारपूर्ण ब्यवहारका साथ देश, लोकतन्त्र र जनताप्रतिको जवाफदेहीतामा कांग्रेस गम्भीर छ । भोलिको सांकेतिक प्रदर्शनबाट थप शक्ति हासिल गर्दै आगामी संसदमा नेपाली कांग्रेस थप प्रभावकारी ढंगले प्रस्तुत हुनेछ ।”

उपस्थिति देखाउन सडक 

प्रतिपक्षी दल कांग्रेस संसद नचल्दा सरकारविरुद्ध विज्ञप्तिबाजीमै सीमित थियो । गत असारपछि मात्र कांग्रेसले विभिन्न घटनाहरुमा सयौं विज्ञप्ति जारी गरेको छ ।  सरकारको आलोचना र ध्यानाकर्षण गराएको छ । तर, पछिल्लो समय सडकमा राजावादीहरुको देशभर प्रदर्शनपछि कांग्रेसले आफूलाई न सडकमा न संसदमा भेट्ने अवस्था बनेको भन्दै पदाधिकारी बैठकले नै सडक संघर्ष गर्ने निर्णय गरेको थियो ।

तनहुँमा नेता रामचन्द्र पौडेललाई प्रहरीले नियन्त्रणमा लिएपछि भने कांग्रेस झस्किएको छ । प्रधानमन्त्री केपी शर्मा ओलीइतरका नेताहरुले राजावादीहरुले सडकमा प्रदर्शन गरिरहँदा शान्त बसेको प्रतिपक्षीलाई चलाएर राम्रो नगरेको टिप्पणी गरेका थिए । कांग्रेसले पौडेलमाथि तनहुँमा भएको घटनासहित भ्रष्टाचार, अनियमितता, महिला हिंसाका घटनालाई प्रदर्शनको मुद्दा बनाएको छ । 

प्राध्यापक बराल अहिले कांग्रेस सडकमा आउँदा सडकमा देखिएका राजावादीहरुको प्रतिकारजस्तो पनि हुने बताउँछन् ।  सरकारको निराशापूर्ण काम र मौन प्रतिपक्षी देखेपछि राजसंस्था पक्षधर उत्साही देखिएका बेला कांग्रेसको प्रदर्शनले सरकार र राजावादीहरु दुवैलाई जवाफ हुने उनको टिप्पणी छ । 

“प्रतिपक्षी यस्तो बेलामा सडकमा सक्रिय हुनै पर्छ । राजावादीहरू पनि उत्साहित देखिन्छन् । त्यसको प्रतिकारजस्तो पनि हुन्छ । सडकमा आएर कांग्रेसले प्रतिपक्षीको उपस्थिति देखाएको हो । ठिकैजस्तो लाग्छ । कुरा उठाउनुपर्छ,” उनी भन्छन् ।