काठमाडौं । प्रमुख राजनीतिक दलहरु आन्तरिक तिक्ततामा रुमल्लिइरहेका बेला बुधबार विवेकशील र साझा पार्टीबीच एकता भएको छ । साझा पार्टीका तर्फबाट रवीन्द्र मिश्र र विवकेशीलका मिलन पाण्डेले पार्टी एकताको सहमतिपत्रमा हस्ताक्षर गरेका छन् ।  पुराना पार्टी विस्थापनको चर्चा गरेको विवेकशील साझा पार्टीले आफूलाई नयाँ देखाउने प्रयत्न पनि गर्‍यो । 

पार्टी एकता गर्दा ठूलो भिडभाड जम्मा गरिएन । न त लम्बेतान भाषण र आसन ग्रहण नै भयो ।  ‘भर्चुअल’ पार्टी एकता सम्पन्न भयो केहीबेरमै । रञ्जु दर्शनाले कार्यक्रम सञ्चालन गरिन् । नव एकीकृत पार्टीका संयोजक पाण्डे र अध्यक्ष रवीन्द्र मिश्रले आफ्ना कुरा राखे । पार्टी एकता सम्पन्न भयो । 

उनीहरुले एकीकरण घोषणाका लागि रोजेको दिन पनि अर्थपूर्ण छ । मंसिर २४ अर्थात भ्रष्टाचारविरुद्धको अन्तर्राष्ट्रिय दिवसका दिन पार्टी एकता घोषणा भयो । 

यो दिन रोजेरै सन्देश दिन खोजेको हुनुपर्छ—विवेकशील साझा पार्टी भ्रष्टाचारको विरुद्धमा छ । पार्टी एकताको पक्षमा र भ्रष्टाचारको विरुद्धमा रहेको सन्देशले पक्कै सुशासन र राजनीतिक स्थिरताका पक्षधरहरुलाई केही ढाडस मिलेको हुनुपर्छ । लोकतन्त्रमा दलहरु मिल्नु सुखद् विषय हो । अझ, देशमा प्रतिगनकारी शक्ति सडकमा सल्बलाइरहेको र सत्तामा रहेकाहरुमा  लोकतन्त्र र संविधानवादको प्रतिवद्धतामा प्रश्न उठिरहेका बेला भएको एकता सानै दलको भए पनि अर्थपूर्ण छ । 

उसो त, छोटो समयमा पनि यी दुई दलले टुटफुट भोगिसकेका छन् ।  विवेकशीलको ८ वर्ष र साझा पार्टीको तीनवर्षको इतिहास हो ।  यति छोटो समयमा पनि यी दुई दलबीच एकता भएर १६ महिनामै विभाजन भोगेको तितो अनुभव छ ।  ०७४ साउन ११ मा एकता भएर ०७५ पुस २७ मा फुटेका यी दुई दल पुनः एक भएका छन् । 

यो एकता कति लामो जाला ? अड्कलबाजी पनि राजनीतिक बजारमा सुरु भइसकेको छ । सामाजिक सञ्जालदेखि सामाजिक अभियान लिएर मैदानमा उत्रेका केही विवेकशीलका संस्थापक एकता प्रक्रियामा छुटेका छन् । त्यसले पनि अहिलेको एकतालाई केही खल्लो बनाएको छ । 

कतिपयले यो एकता के का लागि ? भनेर प्रश्न नगरेका होइनन् ।

त्यसमा अध्यक्ष मिश्रले जवाफ दिएका छन् । उनले एकता घोषणासभामा परम्परागत राजनीतिक शक्तिमाथि धावा पनि बोलेका छन् । “यो एकीकरणले परम्परागत राजनीतिको दुस्चक्रबाट नेपाली समाजलाई मुक्त गर्नेछ भन्ने हाम्रो विश्वास हो । यो एकीकरणले भ्रष्टाचार, कुशासन र राज्यहीनताको अवस्थाबाट थिलथिलो भएको नेपाली नागरिकका सपनाहरुलाई पुनर्जागृत गर्दै राजनीतिमा नयाँ आशा सञ्चार गर्नेछ भन्नेमा पनि हामी विश्वस्त छौं,” मिश्रले घोषणा सभाबाट पार्टी एकताको सन्देश सम्प्रेषित गर्ने प्रयत्न गरे । 

उनले अहिले सत्तारुढ दल नेकपाभिको कचकच र प्रमुख प्रतिपक्षी दल नेपाली कांग्रेसको नेतृत्व तहको घिसिरपिटिरबाट दिक्क भएकाहरुलाई पनि तरंगित गर्न प्रयत्न गरेका छन् ।  परम्परागत राजनीतिबाट आजित नेपालीलाई सुन्दर, लोकतान्त्रिक र अग्रगामी राजनीतिक विकल्प दिने उनको उद्घोषले विद्यमान लोकतान्त्रिक दलभित्र आफुलाई अटाउन नसक्नेहरुलाई बाटो खोल्न खोजेका छन् ।

मिश्रको घोषणाले लोकतन्त्रमा विश्वास गर्ने तर, आफुलाई लोकतान्त्रिक दाबा गर्ने दलको सदस्यता नलिएकाहरुलाई कत्तिको आकर्षण गर्छ त्यो थाहा पाउन केही समय कुर्नैपर्छ ।  सहरका मध्यमवर्गलाई छोटो समयमा राम्रै आकर्षित गरेको यी पार्टीको एकताले तरंग सिर्जना गर्छ नै ।  तर, यसअघिको फुटले केही समय विवेकशील साझा पार्टीलाई आफ्नो एकता साच्चैको एकता हो भनेर विश्वास जित्नका लागि लाग्छ नै । 

नेपालमा राजनीतिक दलमाथि मात्र होइन नागरिकमाथि पनि कटाक्ष गरिन्छ । दल चयनको सन्दर्भमा नेपाली नागरिकमाथि लाग्ने आरोप छ–मेनु हेर्ने, तर अन्तिममा मम, चाउमिन नै अर्डर गर्ने । यसपटक मिश्रले ती नागरिकलाई कडै धम्की पनि दिएका छन् । विवेकशिल साझा पार्टीलाई साथ नदिए यती, ओम्नी, बालुवाटारजस्ता भ्रष्टाचारका काण्ड भइराख्ने चेतावनीमा मात्र मिश्र रोकिएका छैनन् । उनले आफ्नो दललाई विश्वास गरे दशकभित्रै रुपान्तरणको आश्वासन पनि बाँड्न भ्याएका छन् । 

विवेकशील साझाले आफुलाई कत्तिको खरो उतार्ला, त्यो आगामी दिनमा देखिनेनै छ । आगामी निर्वाचनसम्म एकतावद्ध भएर गएमा नयाँ पुस्ता र शहरीया मध्यमवर्ग आकर्षित हुनसक्छ ।