काठमाडौं । कोरोना भाइरसको महामारीका कारण नेपाली खेलकुद लामो समयदेखि ठप्प छ । केही खेलका प्रशिक्षणहरु भए पनि प्रतियोगिता भने सञ्चालनमा आउन सकेका छैनन् । यसैबीच नेपाली राष्ट्रिय पुरुष फुटबल टोली लामो समयपछि मैत्रीपूर्ण खेलमा लागि मैदान फर्केको छ ।

नेपाली फुटबल टोलीले बंगलादेशसँग दुई मैत्रीपूर्ण खेल खेल्दै छ । त्यसमा लागि नेपाली टोली बिहीबारदेखि दशरथ रंगशालामा प्रशिक्षण गरिरहेको छ । विश्वकप छनोटका लागि रहेका ३४ खेलाडीलाई नै एन्फाले प्रशिक्षणका लागि बोलाएको हो । हाल खेलाडीहरु कोरोना भाइरससम्बन्धी मापदण्डहरु अपनाएर प्रशिक्षण थालेका छन् । तीमध्ये ५ जनामा भने कोरोना संक्रमण देखिएकाले प्रशिक्षणमा सहभागी छैनन् । उनीहरु करिब आठ महिनापछि प्रतियोगिताका लागि मैदान फर्किएका हुन् ।

यसअघि टोलीले केही दिन एन्फा कम्पलेक्समा प्रशिक्षण गरेको थियो । कोरोना भाइरसको महामारी बढ्दै गएपछि प्रशिक्षण केही दिन रोकिएको थियो । पुरुष फुटबल टोलीले यसरी प्रशिक्षण गरिरहँदा महिला फुटबलबारे भने हालसम्म एन्फाले केही निर्णय गरेको छैन । पुरुष फुटबलका लागि बारम्बार सोच्‍ने एन्फाले महिला खेलाडीको प्रशिक्षण या अन्य कुनै विषयमा निर्णय नगर्दा समस्या भएको एन्फाप्रति महिला फुटबल खेलाडीहरुको दुखेसो छ ।

नेपाली महिला फुटबल टोलीकी खेलाडी सावित्रा भण्डारीलाई पुरुष फुटबल टोली प्रशिक्षणका लागि फर्कने थाहा पाएपछि नै महिला टोलीका लागि पनि एन्फाले केही निर्णय गर्छ भन्ने आशा थियो । तर त्यसो हुन सकेन । लामो समय घरमा बसेका महिला फुटबल टोलीका खेलाडीले पनि मैदान फर्कने आशा निराशामा बदलिएको छ । नत एन्फाले महिला टोलीलाई मैदान फर्कने विषयमा हालसम्म कुनै निर्णय गरेको छ । नत तयारी नै ।

पुरुष टिमको मैत्रीपूर्ण खेलका लागि प्रयास गर्ने एन्फाले महिला टोलीको मैत्रीपूर्ण खेलमा लागि कुनै प्रयास नगरेको खेलाडीको दुखेसो छ । जसरी पुरुष टोलीको मैत्रीपूर्ण खेल र प्रशिक्षणले आकार लियो त्यसरी नै महिला टोलीले पनि खेल्न पाउने खेलाडीको आशा छ ।

“पुरुष फुटबल टोलीको प्रशिक्षण हुने थाहा पाएपछि हाम्रो विषयमा पनि केही निर्णय होला भन्‍ने आशा थियो । तर हालसम्म कुनै निर्णय भएको छैन । लामो समयदेखि मैदानबाहिर पुरुष टिम मात्र होइन हामी पनि बसेका छौं । फिटनेस र खेलको लय गुमाउनेप्रति हाम्रो पनि चिन्ता छ । लामो समय घरमा बसेका हामी मैदान कहिले फर्कने भन्ने विषयमा सोचिरहेका छौं । तर, एन्फाले हालसम्म कुनै निर्णय गरेको छैन,” सावित्राले बाह्रखरीसँगको कुराकानीमा भनिन् ।

यता एन्फाका प्रवक्ता किरण राईले पुरुष टोलीको मैत्रीपूर्ण खेल भएका कारण प्रशिक्षणमा बोलाउनुपरेको बताए । सरकारले दिएको निर्देशनको पालना गर्दा हालका लागि महिला टोलीको प्रशिक्षणका लागि कुनै किसिमको निर्णय नभएको बताएका छन् ।

“पुरुष टोलीको मैत्रीपूर्ण खेल भएका कारण प्रशिक्षणका लागि बोलाइएको हो । महिला टोलीको प्रशिक्षणका लागि भने हालसम्म कुनै निर्णय हुन सकेको छैन । बढ्दै गएको कोरोना भाइरसको महामारीले पनि तत्काल कुनै किसिमको प्रशिक्षण गर्न सकिने अवस्था छैन,” प्रवक्ता राइले बाह्रखरीसँग भने । 

-फाइल तस्बिर