काठमाडौं । गत वर्ष घरेलु मैदानमा सम्पन्‍न सागमा नेपालले ऐतिहासिक सफलता हात पार्न सफल भयो । साग इतिहासमा नेपालले पहिलोपटक ५१ स्वर्ण जित्न सफल भयो । नेपालले जितेको ५१ वर्ष देशका लागि गर्वको विषय बन्यो ।

घरेलु मैदानमा सबै खेलाडीले आफूले सकेको गर्दै नेपाललाई सफलता दिलाउन महत्त्वपूर्ण योगदान गरे । नेपाली खेलाडीले जितेका स्वर्णमध्ये धेरै विधाका स्वर्ण ऐतिहासिक थिए । उक्त विधाहरुमा नेपालले पहिलोपटक स्वर्ण जितेको थियो ।

गल्फदेखि लिएर तेक्‍वान्दो र करातेमा नेपालले गएको सागमा धेरै सफलता हात पार्न सफल भयो । घरेलु मैदानमा हुने सागमा धेरै तयारी गरेको नेपालले आफूले सोचेअनुरुप नतिजा पनि हात पार्न सफल भयो । उक्त नतिजाको हकदार बने सबै खेलाडी ।

सागमा नेपाली साइक्लिङको इतिहास लामो छैन । सन् २०१६ मा नेपाल पहिलोपटक सागको साइक्लिङमा सहभागी भएको थियो । पहिलोपटक नेपाललाई सफलता भने हात परेन । त्यतिबेला नेपाली माउन्टेन बाइकिङका खेलाडीले रोड साइक्लिङमा सहभागिता जनाएका थिए । १२औँ सागको साइक्लिङ विधामा सहभागिता जनाउने नेपाली खेलाडीमध्ये एक थिइन् लक्ष्मी मगर । उनी त्यतिबेला नेपाललाई पदक दिलाउन असमर्थ भइन् ।

माउन्टेन बाइकिङ विधाकी लक्ष्मीले १३औँ सागमा यो विधा समावेश हुने आशा गरेकी थिइन् । भयो पनि । साइक्लिङमा नेपालको सहभागिताका हिसाबले दोस्रो सागमा लक्ष्मीसहित अन्य खेलाडीहरू ऐतिहासिक स्वर्णको हकदार बने । लामो समयदेखि तयारी गरेकी लक्ष्मीले घरेलु मैदानमा भएको प्रतियोगितामा स्वर्ण जित्ने विश्वास लिएकी थिइन् ।

उसो त घरेलु मैदानमा भएको सागमा सहभागी हुने सबै नेपाली खेलाडीले खेल स्थानमा अभ्यास गर्न भने पाएनन् । जसले पाए उनीहरूको नतिजा सुखद भयो । खेल स्थानमा कम तयारी गरेर पनि केही खेलाडीले राम्रो सफलता हात पारे । लक्ष्मीले सागको तयारी गर्ने समयमा भन्दा प्रतियोगिताको दिनमा केही मिनेट धेरै लगाइन् । तै पनि उनको स्वर्ण यात्रामा कोही बाधक भने बन्न सकेन । १२औँ सागदेखि नै रहेको स्वर्णको भोक उनको खेलमा प्रस्ट देख्‍न सकिन्थ्यो ।

“माउन्टेन बाइकिङ विधाको पर्खाइमा थिएँ । १२औं सागमै यो विधा समावेश भएको भए सफलता मिल्ने कुरामा दुईमत थिएन । ढिलै भए पनि सफलता मिल्यो । यसका लागि तयारी पनि बेग्लै किसिमको थियो । स्पर्धामा आफूले सोचेभन्दा धेरै राम्रो प्रदर्शन गर्न सक्छु भन्नेमा विश्वस्त थिएँ । त्यसको सफलता घरेलु मैदानमै हात पर्दा धेरै खुसी छु,” लक्ष्मीले भनिन् ।

लामो समयदेखि यही प्रतिस्पर्धाका लागि तयारी गरेकी उनलाई स्वर्ण जित्दा भने धेरै खुसी भने मिलेन । उनकै भाषामा भन्दा लामो समयदेखि तयारी गर्दा मिलेको टाइमिङभन्दा उनी केही समयपछि परिन् । जसले गर्दा उनलाई आजसम्म पनि आफूले सोचे जस्तो उत्कृष्ट प्रदर्शन गर्न नसकेको महसुस हुन्छ ।

“सागको तयारी गर्दा मेरो टाइमिङ एकदमै राम्रो थियो । सागमा जस्तोसुकै प्रतिस्पर्धी आए पनि हराउन सक्छु भन्‍ने लागेको थियो । अन्तिम दिनमा भने त्यसले निरन्तता पाउन सकेन । सफला त मिल्यो तर आफूले अनुमान गरेबमोजिम भने प्रदर्शन गर्न सकिनँ । मलाई सफलता मिल्नुभन्दा ठूलो कुरा आफूले सोचेभन्दा उत्कृष्ट प्रदर्शन गर्नुमा गर्व महसुस हुन्छ,” लक्ष्मीले भनिन् ।

लक्ष्मीले माउन्टेन बाइक क्रस कन्ट्रीको विधामा नेपालका लागि स्वर्ण जिताएकी थिइन् । उनले जितेको स्वर्ण १३औं सागमा नेपालका लागि दोस्रो हो । पोखरामा भएको साइक्लिङको विधामा नेपालले चार स्वर्ण जितेको थियो । साइक्लिङको विधामा नेपालले जितेको सबै स्वर्ण पहिलो हो । स्वर्ण जितिसकेपछि लक्ष्मी धेरै उत्साही पनि भइनन् । खेल हुने स्थानमा लामो समय तयारी गर्न नपाएकी उनले प्राविधिक कुरामा भने केही कजोर भएको महसुस गरिन् ।

“सधैं देखिरहेको स्थानमा पनि तयारी गर्न पाएनौं । लामो समयबाट खेल हुने स्थानमा तयारी गरेको भए हामीले सोचेभन्दा धेरै राम्रो प्रदर्शन गर्ने थियौं । खेल हुने केही दिनअघि मात्र हामीले उक्त स्थानमा तयारी गर्न पायौं । त्यसैले त्यहाँको प्राविधिक कुरामा कमजोरी भए पनि खेलमा भने कमजोरी भएन । सफलता हात पर्‍यो त्यसैमा खुसी छु,” लक्ष्मीले सागलाई सम्झिँदै भनिन् । 

सन् २००८ बाट साइक्लिङ गर्न थालेकी लक्ष्मी ठूलो प्रतियोगितामा सहभागी भएको २०१२ देखि हो । छोटो समयमा मिलेको ठूलो सफलतामा भने उनी खुसी छन् । नेपालमा माउन्टेन बाइकिङका लागि धेरै सम्भावना भएको देखेर नै उनलाई यो विधाले लोभ्याएको हो ।