फाइल तस्बिर ।

जनकपुर । सर्लाहीमा नेपाली कांग्रेसका कार्यकर्ता र प्रहरीबीच झडप हुँदा डीएसपीसहित दुई दर्जन सुरक्षाकर्मी घाइते भएका छन् । 

असोज २१ गते जिल्लाको रामनगर गाउँपालिका –७ निवासी कांग्रेस कार्यकर्ता महेन्द्र रामको हत्या भएको थियो । उक्त घटनाको निष्पक्ष छानबीन गर्न माग गर्दै नेपाली कांग्रेसका नेताहरुले चरणबद्ध रुपमा प्रदर्शन गर्दै आएका थिए । बुधबार कांग्रेस नेता एंव प्रतिनिधिसभा सांसद अमरेशकुमार सिंहको नेतृत्वमा प्रदर्शन गर्दै जिल्ला प्रहरी कार्यालय घेराउ गरिएपछि प्रहरीसँग झडप भएको हो । 

झडपमा नेपाल प्रहरीका डीएसपी उद्धवसिंह भाट र सशस्त्र प्रहरी निरिक्षक राजकुमार झासमेत ४० जना सुरक्षाकर्मी घाइते भएका छन् । झडपमा दुई दर्जन भन्दा बढी प्रदर्शनकारी पनि घाइते भएको कांग्रेसका प्रदेश सांसद उपेन्द्र कुशवाहाले जानकारी दिए ।

ठूलो संख्यामा जिल्ला प्रहरी कार्यालय नजिक पुगेको प्रदर्शनकारीको भिडलाई नियन्त्रणमा लिन खोज्दा झडप भएको जिल्ला प्रहरी कार्यालयका प्रवक्तासमेत रहेका डिएसपी मदन कुँवरले बताए । उग्र प्रदर्शनकारीहरुले जिल्ला प्रहरी कार्यालय तोडफोडमा उत्रेपछि भिडलाई तितरवितर पार्न अश्रु ग्यास र लाठी चार्ज गर्नुपरेको उनले बताए । प्रहरीले ३१ राउण्ड अश्रुग्यास फायर गरेको छ ।

"दिनदहाडै हत्या भएको घटना छानबीनको लागि एक हप्तादेखि माग गर्दै आएका छौं, अहिलेसम्म पीडित परिवारको जाहेरीसमेत प्रहरीले लिन मानेको छैन," कांग्रेस सांसद कुशवाहाले बाह्रखरीसँग भने, "माथिको निर्देशन भन्दै घटनाको जाहेरी दर्ता नगरेको र निष्पक्ष छानबीन हुने संकेत पनि नदेखिएपछि बाध्य भएर दबाव स्वरुप शान्तिपूर्ण प्रदर्शनमा उत्रेको बेला सुरक्षाकर्मी ज्यादतिमा उत्रेको हो ।"

सांसद सिंह, प्रदेशसभा सदस्य कुशवाहा र विरेन्द्रप्रसाद सिंह लगायत अगुवा नेताहरुको कमाण्डमा प्रदर्शनमा उत्रेका कांग्रेस कार्यकर्ताहरु निकै आक्रोसित भएर प्रस्तुत भएपछि नियन्त्रणको क्रममा झडप हुन पुगेको प्रहरी भनाइ छ । झडपपछि जिल्ला भरको सुरक्षाकर्मी तैनाथ गरिएको छ भने प्रदेश प्रहरी कार्यालयबाट समेत थप सुरक्षाकर्मी परिचालन गरिएको प्रदेश प्रहरी प्रमुख डिआइजी धिरजप्रताप सिंहले बताए ।