काठमाडौं । लामो समय प्रशिक्षणविहीन हुँदै घरमै थन्किएका खेलाडी मैदान फर्काउने सबैभन्दा पहिलो दायित्व खेलकुद संघको हो । आफ्ना खेलाडी मैदानमा फर्काउन संघ स्वयं अग्रसर हुनुपर्ने हो । संघले आफ्नो योजना, खेलकुद कार्यक्रमलगायत विषय राष्ट्रिय खेलकुद परिषद् (राखेप) मा पेस गर्दै प्रशिक्षणका लागि अनुमति माग्‍नुपर्ने हो। 

खेल संघले खेलाडी मैदान फर्काउन आँट गरेको छैन । हामी सुरक्षा अपनाएर प्रशिक्षणमा फर्किन तयार छौं, भन्‍न सक्नुपर्ने हो । तर, योजना नभएका संघलाई अहिले कोरोना भाइरसको महामारीको बहानाले सहज बनाइदिएको छ ।

आफ्ना खेलाडी प्रशिक्षणमा फर्काउने नेपाल ब्याडमिन्टन संघ पहिलो बनेको छ । तर, ब्याडमिन्टन संघले राखेपबाट आधिकारिक अनुमति भने लिएको छैन । मौखिक अनुमतिमै भए पनि आफ्ना खेलाडीको प्रदर्शनको चिन्ता लिनु यो समयमा सबैभन्दा ठूलो कुरा हो ।

योसँगै ओलम्पिक छनोटमा परेका कराते खेलाडीको समेत प्रशिक्षण सुरु भएको छ । तर, अन्य खेलका खेलाडीलाई भने ओलम्पिक कमिटीले पनि मैदानमा फर्काउन सकेको छैन । सात खेलका १२ खेलाडी मात्र भए पनि ओलम्पिक कमिटीले प्रशिक्षण गराउन नसक्नु आफैंमा लज्जास्पदको हो ।

राखेप सदस्य-सचिव रमेशकुमार सिलवाल पनि खेलाडीले ग्यासको सिलिन्डर र चामलको बोरोमा गरेको प्रशिक्षणमै मख्ख छन् । खेलाडीले आफ्नो वरिपरि जे स्रोत-साधन थियो, त्यो प्रयोग गरेर आफूलाई मेन्टेन गर्ने काम गरिरहेको सिलवाल स्वयं बताउँछन् ।

यसैबीच अखिल नेपाल फुटबल संघ (एन्फा) ले भने राखेपसमक्ष प्रशिक्षण अनुमतिका लागि निवेदन दर्ता गरेको थियो । आधिकारिक प्रशिक्षण अनुमतिका लागि राखेपमा निवेदन दिने एन्फा पहिलो संघ पनि बन्यो । “अहिलेसम्म एन्फाबाट मात्र प्रशिक्षणका लागि भन्दै लिखित पत्र आएको छ,” राखेप सदस्य-सचिव सिलवालले भने, “मैले उहाँहरूलाई भनिदिएको छु । तपाईंहरू स्वास्थ्य प्रोटोकल अपनाएर प्रशिक्षण सुरु गर्नुहुन्छ भने गर्नुस् । एक महिनाजति स्वास्थ्य प्रोटोकल अपनाएर प्रशिक्षण गर्नुभयो भने त्यसपछि प्रतियोगिता सुरु गरौंला ।”

तर, अहिलेको अवस्थानमा दर्शकविनाको प्रतियोगिता गर्न सकिने उनको बुझाइ छ । उनले दर्शकविनाको प्रतियोगिता गर्न सकिने भए पनि त्यति आकर्षक नहुने जिकिर गरे । “दर्शकविनाको खेलमा जित-हार त हुँदोरहेछ । खेलमा ऊर्जा नहुँदो रहेछ । तर, पनि खेल नहुनुभन्दा खेल भएर अल्झाउनु राम्रो हो,” सिलवालले भने ।

सदस्य-सचिव सिलवालले एन्फालाई स्वास्थ्य प्रोटोकल अपनाएर प्रशिक्षण गर्न अनुमति दिएको भने पनि एन्फा अध्यक्ष कर्माछिरिङ शेर्पाले आफूलाई यसबारे थाहा नभएको बताउँछन् । उनले मौखिक रुपमा सदस्य-सचिवले भनेको कुरा अहिलेसम्म आफूले नसुनेको बताए ।

“तपाईंहरू स्वास्थ्य प्रोटोकल अपनाएर प्रशिक्षण सुरु गर्नुहुन्छ भने गर्नुस् भनेर कोसँग भन्‍नुभयो मलाई थाहा छैन । मलाई अहिलेसम्म भन्‍नुभएको छैन,” शेर्पाले भने, “फेरि हामी मौखिक रुपमा भन्दैमा प्रशिक्षण सुरु गर्दैनौं । हामीले फिफा र एएफसीको गाइडलाइनलाई पनि फलो गर्नुपर्ने हुन्छ । आधिकारीक अनुमतिविना प्रशिक्षण सुरु गर्न सकिँदैन ।”

एन्फाले भदौ तेस्रो सातातिर प्रशिक्षण र मैत्रीपूर्ण खेलको अनुमतिका लागि राखेपमा निवेदन पेस गरेको थियो । उक्त निवेदन राखेपले उच्च स्तरीय कोरोना रोकथाम नियन्त्रण तथा व्यवस्थापन समिति (सीसीएमसी) मा बुझाउने बताएको थियो । हाल एन्फाको उक्त निवेदन सीसीएमसीमा रोकिएको जनाइएको छ ।

“हामीले निवेदन दिँदा सदस्य-सचिवले म सहयोग गर्छु भन्‍नुभएको थियो । त्यतिबेला योबाहेक अन्य कुनै कुरा भएको छैन । त्यतिबेला उहाँले राम्रौ कुरा गर्नुभएको थियो,” उनले भने, “उहाँले कसलाई मौखिक अनुमति दिनुभयो थाहा छैन । हामीले प्रशिक्षण र मैत्रीपूर्ण खेलका लागि अनुमति मागेका थियौं । अहिले सीसीएमसीमा फाइल रोकिएको छ रे । त्यसबारे पनि बुझ्दै छौं ।”

एन्फा अध्यक्ष शेर्पाले पछिल्लो समय धेरै राष्ट्रबाट मैत्रीपूर्ण खेलका लागि प्रस्ताव आइरहेकाले प्रशिक्षण छिटोभन्दा छिटो सुरु गर्नुपर्ने बताए । प्रशिक्षणको अनुमति नपाउँदा मैत्रीपूर्ण खेलका लागि आएका प्रस्ताव पनि अन्योलमा रहेको उनको गुनासो छ ।