जनकपुर । प्रदेश २ मा तीन महिनापछि आइतबार बसेको प्रदेशसभा बैठकले प्रदेश अनुसन्धान ब्‍युरो स्थापना, काम, कर्तव्य र अधिकार सम्बन्धमा व्यवस्था गर्न बनेको विधेयक २०७६ पारित गरेको छ ।

कोरोना महामारीबीच गत असार ३१ गते प्रदेशसभाको अन्तिम बैठक बसेको थियो । त्यसयता पहिलोपटक आइतबार बसेको बैठकमा आन्तरिक मामिला तथा कानुनमन्त्री ज्ञानेन्द्रकुमार यादवले प्रस्तुत गरेको उक्त विधेयक सर्वसम्मतिले पारित भएको सभामुख सरोजकुमार यादवले घोषणा गरेका छन् ।

बैठकमा महिला, बालबालिका तथा सामाजिक न्याय समिति सभापति जयनुल राइनले स्वास्थ्य सेवासम्बन्धी विधेयक २०७६ दफावार छलफलका लागि सभामा पेस गरेका थिए । त्यस्तै, आर्थिक मामिला तथा योजनामन्त्री विजयकुमार यादवले कर तथा गैरकर राजस्व लगाउने र उठाउने कानुनी व्यवस्था गर्न बनेको विधेयक २०७६ छलफलका लागि सभामा पेस गरे ।

बैठक सुरु हुनासाथ नेपाली कांग्रेका सांसदहरुले ६ महिना बित्दा पनि क्‍वारेन्टिनको व्यवस्था गर्न नसकेको भन्दै सम्बन्धित मन्त्रालयको जवाफ माग्दै सदन अवरुद्ध गरेका थिए । उनीहरुको अवरोधपछि सभामुख यादवले सरकारको ध्यानाकर्षण भएको र आजको बैठकमा शून्य तथा विशेष समयको व्यवस्था नरहेको भन्दै बैठक नियमित गराएका थिए । प्रदेशसभाको अर्को बैठक भोलि (सोमबार) दिउँसो १ बजे बोलाइएको छ ।