जनकपुर । त्रिभुवन विश्वविद्यालयअन्तर्गत जनकपुरस्थित रामस्वरुप रामसागर बहुमुखी (राराब) क्याम्पसमा अध्यापनरत आंशिक प्राध्यापकहरुले कलेजको मुल गेटमा ताला लगाएर धर्नामा बसेका छन् । 

समान कामको समान ज्याला व्यवस्था हुनुपर्ने माग राखेर आन्दोलित आंशिक प्राध्यापकहरुले देशव्यापी आन्दोलनमा उत्रेका हुन् । यसक्रममा शुक्रबार काठमाडौंस्थित उपकुलपतिको कार्यालयमा समेत तालाबन्दी गरिएको आंशिक प्राध्यापक संघका केन्द्रीय उपाध्यक्ष इन्द्रदेव यादवले बाह्रखरीलाई जानकारी दिए ।

करारमा रहेका र स्थायी प्रकृतिको जागिर खाइरहेका प्राध्यापकहरुको तुलनामा काम बढी गरेको तर ज्याला उनीहरुको तुलनामा दस भागको एक भाग पनि पाउन नसकिरहेको गुनासो उनीहरुको छ । “मैले आंशिक प्राध्यापकको रुपमा काम गर्न थालेको १४ वर्ष बितिसक्यो” राराब क्याम्पसमा अध्यापनरत आंशिक प्राध्यापकमध्येका शम्भुनारायण झाले भने, “न करारको विज्ञापन गरिन्छ न हाम्रो श्रमको सम्मान हुन्छ ।”

२०७४ साल मंसिर आठ गते नेपाल सरकार मन्त्रिपरिषद्को निर्णयबाट त्रिभुवन विश्वविद्यालय मातहत एक हजार चार सय २० जना प्राध्यापकको लागि दरबन्दी कायम गरिए पनि अहिलेसम्म कार्यान्वयन हुन नसकेको उनीहरुको गुनासो छ । दैनिक ज्यालादारीबाट मासिक ज्यालादारीको व्यवस्था गरिदिए पनि हुने अपेक्षा प्रकट गर्दै आन्दोलनरत प्राध्यापकहरुमध्येकी किरण झाले भनिन्, “कम्तीमा मजदुर वर्गका लागि सरकारले दुई छाक मात्रै पुग्‍ने गरी भए पनि राहत त उपलब्ध गरायो । हामी सात महिनादेखि एक सुको नपाएर बेहालमा परेका छौं ।” 

राज्यले प्राज्ञिक वर्गको अपमान गरेर शिक्षाको अवमूल्यन गरिरहेको आरोप लगाउँदै उनीहरुले आफूहरुको माग सुनुवाइ नभएसम्म कलेजको मुलगेट बन्द गरेर सडकमा धर्ना बसिरहेको चेतावनी दिए ।