काठमाडौं । पछिल्लो सात महिनादेखि नेपाली खेलकुद ठप्प रहँदा खेलाडी घरभित्रै खुम्चिन बाध्य भएका छन् । उनीहरु प्रशिक्षणका लागि मैदानमा फर्किन आँतुर छन् । खेलाडीहरुलाई आफ्नो लयको चिन्तामा छन् । उनीहरु आर्थिक समस्यामा समेत परेका छन् । 

विशेषगरी व्यवसायिक फुटबल खेल्ने खेलाडी निकै नै समस्यामा परेका छन् । उनीहरुलाई न संघले हेरेको, न त क्लब र सरकारले । यस्तो अवस्थामा पनि खेलाडी मैदान फर्किन चाहन्छन् । प्रशिक्षण गर्न चाहन्छन् । 

फुटबल गतिविधि सञ्‍चालन गर्न अनुमतिका लागि अखिल नेपाल फुटबल संघ (एन्फा) ले राष्ट्रिय खेलकुद परिषद् (राखेप) मा निवेदन समेत पेश गरेको छ । तर, तिनै एन्फा मातहतमा रहेको सहिद स्मारक ए डिभिजन लिग खेल्ने क्लबले प्रशिक्षण सुरु नगर्न राखेपलाई दबाब दिएको खुलेको छ । 

एलिट क्लब विराटनगरको आयोजनामा कोरोना भाइरसले नेपाली खेलकुद क्षेत्रमा ल्याएको चुनौती र सम्भावनाका विषयमा बिहीबार भएको अनलाइन अन्तरक्रिया कार्यक्रममा बोल्दै राखेपका सदस्य सचिव रमेश कुमार सिलवालले ए डिभिजन लिगले प्रशिक्षण सुरु नगर्न दबाब दिएको बताएका छन् । उनले प्रशिक्षणको विषयमा दोहोरो दबाब आइरहेको बताएका हुन् । 

सिलवालले भने, “एन्फाले छिटोभन्दा छिटो खेलकुदको माहोल सुरु गर्नुपर्‍यो भनिरहेका छ । तर, अर्कोतर्फ क्लबहरुले भने अहिले सुरु नगर्न दबाब दिइरहेका छन् । म त्यस्तो निकायमा छु कि मैले सरकारको निर्देशन पनि मैले मान्‍नुपर्ने अवस्था छ । त्यसलाई पनि लागु गर्नु मेरो जिम्मेवारी हो । सम्बन्धित खेलको भविष्य पनि मैले हेर्नु पर्नेछ । यो सबैलाई मैले समन्वय गरिरहेको छु ।”

क्लबहरुले दबाब दिएको विषयमा उनले भने, “काठमाडौंको ए डिभिजन फुटबल क्लबका केही साथीहरु आएर मलाई मिडियाको हल्लामा आएर तपाईंले खेलकुद गतिविधि छिट्टै नै सुरु गर्दै हुनुहुन्छ रे ? हाम्रो अनुरोघ चाहीँ छिट्टै खेलकुद गतिविधि सुरु नगरी दिनूस् भन्ने हो ।”

प्रतिउत्तरमा आफूले क्लबहरुलाई ‘तपाईकै साथीहरु आएर छिटो खेल गतिविधि सुरु गर्न भनिरहेका छन् । तर, तपाई चाहीँ ढिलो भन्दै हुनुहुन्छ । किन भनेर मैले सेधेको’ सदस्य सचिव सिलवालले बताए । 

क्लबहरुले गरेको आग्रहका विषयमा सिलवालले भने, “उनीहरुले दाइ हामीले हेल्थ प्रोटोकल मान्‍नुपर्ने हुन्छ । त्यसका लागि हामीसँग होस्टेल छैन । हामीसँग आफ्नो सेप्रेट होटेल पनि छैन । खेल गतिविधि सुरु भए होटेलमा राख्नु पर्‍यो । हामीले होटेलमा राख्नु पर्‍यो भने एक खेलाडी बापत कम्तिमा दिनको तीन हजार खर्च हुन आउँछ । एक महिना यस्तै गरी बस्‍नु पर्‍यो भने हाम्रो एक लाख खर्च हुन आउँछ । करिब २० जना खेलाडी मात्र राख्‍ने हो भने, प्रतियोगिता नहुँदा एक महिनाको २० लाख खर्च गर्ने हाम्रो क्षमता छैन् ।” 

प्रायोजक विस्तारै भाग्दै छन् । हाम्रो ढुकुटीमा पैसा पनि छैन । त्यसैले बरु प्रतियोगिताको माहोल बनेपछि त्यसको अलिकति अगाडिदेखि प्रशिक्षण सुरु गरिदिए हुन्छ । तपाईंले मिडियाबाट दबाब आयो भन्दैमा अहिले नै हतार नगरी दिनुस् । अर्को तिरबाट ढिलो भयो प्रशिक्षण  सुरु गर्नुपर्छ भन्‍ने दबाब आइरहेको छ । 

सदस्य सचिव सिलवालले प्रशिक्षण सुरु गर्न सरकारसँग पनि छलफल गरिरहेको बताएका छन् । तर, पछिल्लो समय जनघनत्व बढी भएको काठमाडौं जस्तो ठाउँमा कोरोना संक्रमणको संख्या बढ्दो भएकाले दुई चार दिन वेट एण्ड सीको अवस्था बाहेक अर्को विकत्ल्प नभएको उनको बुझाइ छ ।  

कोरोनाले खेलाडी र प्रशिक्षकको मानसिक असर पारेकाले छिट्टै प्रशिक्षणका लागि मैदानमा फर्काउन आफूलाई पनि दबाब भएको उनले बताए । खेलाडीहरुले यस्तो अवस्थामा सिक्न र प्रतियोगिता खेल्न नपाएको भन्दै उनीहरुमा मानसिक असर परेको  बताए । 

राखेप सदस्य सचिव सिलवालले खेलाडीमा मानसिकसँग सँगै आर्थीक असर पनि परेको बताए । विभागिय टोलीमा रहेका खेलाडीलाई त्यती असर नपरे पनि खेल खेलेर जिविकोपार्जन गरिरहेका फुटबल जस्ता खेलाडीलाई भने निकै नै आर्थिक समस्याले पनि असर गरिरहेको बताए । क्लबहरु आर्थिक रुपमा बलियो नभएको र पाउनु पर्ने सम्झौता अनुसारको पैसा नपाउनुले पनि खेलाडी आर्थिक समस्यामा परिरहेका उनले सुनाए । 

कोरोना भाइरसले खेलाडीमा अबको भविष्य के हुने भन्ने अर्को चिन्ता बढेको बताए । “एउटा माहोल बिस्तारै बन्दै थियो । विभिन्‍न तहबाट खेलकुदको माहोल बनाउने तयारी गरी रहेका थियो । कर्पोरेट सेक्टरलाई पनि कम्तिमा २५ प्रतिशत स्पोन्सर गर्न आग्रहर गरेका थियौ । त्यसले खेल व्यवसायिक बन्‍नसक्ने अवस्था थियो । तर, हाल त्यो पनि सम्भव भएन,” सदस्य सचिव सिलवालले भने ।

उनले खेल गतिविधि सुरु भए लगत्तै सो वातावरण सुरु गर्न कर्पोरेट सेक्टरलाई पनि आग्रह गर्ने बताए । अवस्था केही सामान्य हुने बित्तिकै सातवटै क्षेत्रका खेलाडी र प्रशिक्षकलाई विषयगत र मनोवैज्ञानिक प्रशिक्षण दिने योजना राखेपले बनाइरहेको उनले बताए । सो प्रशिक्षणमा उनीहरुको खानपिन र लामो समयमो विश्रामपछि कसरी प्रशिक्षणमा फर्किने भन्ने विषयको बारेमा छलफल हुने उनले बताए ।