जनकपुर । धनुषाको जिल्ला प्रशासन कार्यालय परिसरमा आइतबार सेवाग्राहीको भिड लागेको छ । कोही नयाँ नागरिकता लिन त कोही पासपोर्ट । कर्मचारीलाई काम गर्न भ्याइ-नभ्याइ छ । 

चैत ११ गते संक्रामक रोग कोभिड १९ (कोरोना) को कारण मुलुकमा बन्दाबन्दी घोषणा गरियो । बन्दाबन्दी खुकुलो हुने बित्तिकै जिल्ला प्रशासन कार्यालयले निषेधाज्ञा जारी गर्‍यो । यसले पूरै छ महिनासम्म सेवाग्राहीको दैनिक प्रशासनिक कार्य ठप्प रहयो । 

सरकारले सार्वजनिक यातायात खोल्न अनुमति दिइसकेपछि जिल्ला प्रशासन कार्यालयले जारी गरेको निषेधाज्ञा अर्थहीन हुन पुग्यो । गाउँदेखि सहरसम्म सर्वसधारणको ओहोरदोहोर बढेपछि धनुषाको जिल्ला प्रशासन कार्यालयले यसै सातादेखि निषेधाज्ञा हटाएको हो । प्रशासनले निषेधाज्ञा हटाएपछि सबैभन्दा बढी भिडभाड त्यहीँ कार्यालयमा देखिन थालेको छ । 

जिल्ला प्रशासन कार्यालयमा छ महिनासम्म प्रतिक्षामा रहेका नयाँ पुस्ताका युवाहरु नागरिकता लिन हतारमा देखिन्छन् । एक जनाले नयाँ नागरिकता लिन तिनका अभिभावकलाई सनाखतका लागि अनिवार्य उपस्थिति हुनुपर्ने हुन्छ । 

यसबाहेक नागरिकताको प्रतिलिपि लिन, राहदानी लिन, सरकारी विज्ञापन भर्न मधेशी, दलित, जनजातीलगायत सिफारिस लिन, युवा क्लब र विभिन्‍न सामाजिक संघसंस्था दर्ता गर्न जस्ता काम लिएर सेवाग्राही जिल्ला प्रशासन कार्यालयमा आउने गरेको त्यहाँका कर्मचारी सुनिल झा बताउँछन् । 

“छ महिनादेखि कार्यालय बन्द भएर होला, यो अवधिमा आइतबार पहिलो पटक जिल्ला प्रशासन कार्यालयमा हामी कर्मचारीलाई सेवाग्राहीको काम गर्न भ्याइ-नभ्याइ छ” झाले बाह्रखरीसँग भने । छ महिनासम्म सार्वजनिक स्थानमा भिडभाड नगर्न, सामाजिक र भौतिक दूरी कायम गर्नजस्ता नियमको पालना गराउने कार्यमा सक्रिय रहेको जिल्ला प्रशासन कार्यालयमा आइतबार देखिएको भिडले कोरोना संक्रमणको जोखिम अत्यन्तै बढेको कर्मचारीहरु बताउँछन् । 

जिल्ला प्रशासन कार्यालयबाहेक मालपोत कार्यालय, विद्युत कार्यालय, आन्तरिक राजश्व कार्यालय, यातायात व्यवस्थाको कार्यालय र अस्पतालहरुमा सेवाग्राहीको भिड अपत्यारिलो तरिकाले बढेको देखिन्छ । 

कोरोना संक्रमणको भयले छ महिनासम्म शरीरभित्रै पीडा दबाएर राखेका दिर्घरोगीहरु अस्पतालमा र अन्य प्रशासनिक कार्य गर्न तथा राजश्व तिर्न सम्बन्धित कार्यालयहरुमा सर्वसधारणको भिड बढेको हो ।