काठमाडौं । नेपालको उत्तरी सीमामा चिनियाँ पक्षले भौतिक संरचनाहरु बनाएको भन्‍ने सूचनाका आधारमा समाचारहरु आएपछि सरकारले हुम्लाका सहायक प्रमुख जिल्ला अधिकारी (सीडीओ) दत्तराज हमाललाई स्पष्टीकरण माग गरेको छ ।  सूचना अधिकारीसमेत रहेका हुम्लाका सहायक सीडीओ हमाललाई गृह मन्त्रालयले परराष्ट्र मन्त्रालयले बोल्‍नुपर्ने ठाउँमा किन सूचना दिएको भन्दै स्पष्टीकरण सोधेको हो ।

हुम्लाको टोलीको सीमा क्षेत्रतर्फ गएको विषयमा बुझ्‍न खोज्दा उनले आफूले जानकारी नदिने र बोल्‍न नमिल्‍ने बताए ।

केही साताअघि जनप्रतिनिधिहसँग लाप्चामा पुगेर फिर्ता भएका सहायक सीडीओ हमालले जनप्रतिनिधिहरु र स्थानीय बासिन्दाको भनाइलाई आधार मानेर चीनले नेपाली भूमिमा भवन बनाएको हुनसक्ने आशयको प्रतिवेदन जिल्लामा पेश गरेको र सो प्रतिवेदन मन्त्रालयमा पठाइएको सूचना विभिन्‍न सञ्‍चारमाध्यमलाई जानकारी गराएका थिए । 

उक्त जानकारी किन दिएको भन्दै २४ घण्टाभित्र जवाफ पठाउन गृहले निर्देशन दिएको छ । उनले बाह्रखरीसँग भने, "अब केही बोल्‍न मिल्दैन । बोल्दाबोल्दै जागिर जानेबेला भइसक्यो । मन्त्रालयले स्पष्टीकरण माग गरेको छ ।"  त्यही प्रतिवेदनका आधारमा मन्त्रालयले प्रमुख जिल्ला अधिकारी चिरन्जीवी गिरीको नेतृत्वमा सुरक्षा समितिको टोलीलाई यसबारेमा सत्यतत्थ्य बुझ्‍न र सिमा स्तम्भको बारेमा अनुगमन गर्न लाप्चा पठाएको छ । 

असोज ३ गते त्यसतर्फ गएको टोलीले हराएको भनिएको ११ नम्बर पिलर भेटिएको जानकारी पठाएको नाम्खा गाउँपालिकाका अध्यक्ष विष्णुबहादुर लामाले बाह्रखरीलाई बताएका छन् ।  गृहले सीमा विवादको वास्तविकता बाहिर नआउँदै हमाललाई स्पष्टीकरण सोधेको हो ।  सरकारका प्रवक्तासमेत रहेका परराष्ट्रमन्त्री प्रदीपकुमार ज्ञवालीले बुधबार साँझ चीनसँग कुनै सीमा समस्या नभएको दाबी गरेका छन् ।