दाङ । दाङमा शुक्रबार थप ४ जनामा कोरोना संक्रमण देखिएको छ ।

राप्ती स्वास्थ्य विज्ञान प्रतिष्ठान, घोराहीमा गरिएको स्वाब परिक्षणमा घोराहीका ३ जना र दंगीशरण गाउँपालिकाका १ जनामा कोरोना संक्रमण पुष्टि भएको स्वास्थ्य कार्यालय दाङका कोभिड १९ फोकल पर्सन कमल चन्दले जानकारी दिए । संक्रमित हुनेमा जिल्लाको घोराही उपमहानगरपालिका वडा नम्बर १५ का ४० वर्षीय, वडा नम्बर १७ का २० वर्षीय र वडा नम्बर १८ का ६८ वर्षीय पुरूषमा कोरोना देखिएको छ ।

यस्तै, दंगीशरण गाउँपालिका वडा नम्बर ५ का ३२ वर्षीय पुरूषमा पनि कोरोना पुष्टि भएको छ । दाङमा शुक्रबार थप ४ जनामा कोरोना देखिएसँगै जिल्लामा अहिलेसम्म ८५१ जनामा कोरोना पुष्टि भएको छ । तीमध्ये ७३९ जना उपचारपछि निको भइ डिस्चार्ज भइसकेका छन् । अब ११० जनाको विभिन्‍न आइसोलेसन र होम आइसोलेसनमा उपचार भइरहेको छ ।

जस अनुसार कोरोना विशेष अस्पताल बेलझुण्डीमा २२ जना, देउखुरीस्थित कोरोना आइसोलेसन सेन्टर मौरीघाटमा १४ जना, पद्योदय आइसोलेसनमा ३ जना, राप्ती स्वास्थ्य विज्ञान प्रतिष्ठानमा १ जना, जिल्ला बाहिरका आइसोलेसनमा १२ जना र सबै भन्दा बढी होम आइसोलेसनमा ६७ जना उपचाररत छन् । जिल्लामा सबैभन्दा बढी प्रभावित घोराही उपमहानगरका नागरिक भएका छन् ।

अहिलेसम्म घोराहीमा ३४६ जना कोरोना संक्रमित भएकोमा २८४ जना निको भइसकेका छन् भने ६० जना अझै संक्रमित रहेका छन् । यस्तै, दंगीशरणका २ जना, शान्तिनगरका ३ जना, तुलसीपुरका ३२ जना, लमहीका १ जना, राप्ती गाउँपालिकाका ७ जना, गढवाका ३ जना र राजपुरका २ जना गरी ११० जना सक्रिय संक्रमित रहेका छन् । हाल जिल्लाको बबइ गाउँपालिका र दंगीशरण गाउँपालिका कोरोना मुक्त बनेका छन् ।

समुदायस्तरमा कोरोना फैलिएपछि जिल्लामा भदौ १ गतेबाटै स्वरूप परिवर्तन गर्दै निषेधाज्ञा लगाइएको छ । निषेधाज्ञा जारी गरेर कोरोना परीक्षणको दायरा बढाउने भनिएकोमा यस बीचमा करिब १८ सय स्वाब संकलन भइ अधिकांश परीक्षण भइसकेको छ । हिजोमात्रै जिल्लाको शान्तिनगरबाट ९३ जना, तुलसीपुरबाट ८९ जना र घोराहीबाट ७३ जना गरी कुल २५५ जनाको स्वाब संकलन गरी परिक्षणका लागि प्रयोगशालामा पठाइएको छ ।