दाङ । दाङका प्रमुख सहरमध्यको घोराही बजार क्षेत्र तथा मुख्य सडकमा विभिन्‍न ठाउँमा सडक बत्ति जडान भएका छन् । उज्यालो सहर बनाउन मुख्यलगायत विभिन्न घटना तथा दुर्घटनाबाट जोखिम भएका सडक क्षेत्रमा लाखौं खर्च गरेर  विद्युतीय तथा सोलार बत्ती जडान गरिएका हुन् । 

तर, अधिकांश ठाउँका सडक छेउमा विद्युत तथा सोलार बत्तीहरु बल्दैनन् । सडक बत्ती बिग्रिएको लामो समय हुँदा पनि कसैको ध्यान जान सकेको छैन । सडक छेउको विद्युत पोलमा लगाइएका विद्युत बल्बहरु पनि अधिकांश बल्दैनन् । लामो समयदेखि कसैले चासो नदिँदा वत्तिका चिमसमेत बिग्रिएका छन् । ती चिमहरु फेरिएका पनि छैनन् । 

घोराहीको विद्युत कार्यालय रोडस्थित जडान गरिएको सडक सोलार बत्ती नबलेको लामो समय भइसक्यो । सडक बत्ती बिग्रिएको विषयमा जडान तथा मर्मतकर्ताहरु नै बेखबर छन् । "सोलार बत्ती तथा विद्युत सडक बत्ती बल्दैनन्," एक स्थानीयले भने । उज्यालो बनाउनका लागि जडित बत्ति नै नबलेपछि अहिले घोराही बजार करिब अन्धकारजस्तै हुन्छ । सहिद गेट रोडमा जडान गरिएका सडक बत्ती पनि बल्दैनन् । त्यहाँका एक व्यवसायीका अनुसार सगरमाथा सिमेन्टको प्रचारका लागि एपेक्स डिजिटलले लगाएका बत्तीबाहेक अरु बत्ती नबलेको जानकारी गराए । 

"सहिद गेटमा जोडिएको सडक बत्ती बल्दैन, अलिक माथिको वत्ती पनि बल्दैन्, धेरै भइसक्यो नवलेको,"  उनले भने । लामो समय भइसक्दा पनि ती सडक बत्तितर्फ कसैको ध्यान जान सकेको छैन । घोराहीका अन्य मुख्य सडकहरुमा पनि अधिकांश सडक बत्तीहरु नबल्ने स्थानीयले जनाएका छन् । घोराही बजार क्षेत्रका सडक बत्ती नबलिरहको अवस्थामा गाउँको अवस्था राम्रो हुने कुरै भएन । 

घोराही उपमहानगरपालिका १३ डुम्बर गाउँस्थित घोराही सहिद मार्गमा राखिएका अधिकांश सडक बत्तीहरु पनि बल्दैनन् । ती सडक बत्ती बल्न छोडेको लामो समय भइसकेको छ । 

सडक बत्ती नहुँदा चोरी, दुर्घटना तथा विभिन्‍न आपराधिक क्रियाकलाप हुनसक्ने उनको भनाइ छ । सडक बत्ती अत्यावश्यक भए पनि सम्बन्धित निकायको ध्यान जान नसकेको उनको भनाइ छ । घोराही उपमहानगरपालिका सडक बत्ती हेर्ने कर्मचारीले लामो समयदेखि फिल्डमा नगएको स्वीकार गरेका छन् । 

"घोराहीका मुख्य सडकहरुमा पनि कतै सडक वत्ति बल्छन् कतै बल्दैनन्–फिल्ड गएमा थाहा हुन्छ," उनले भने । बजार क्षेत्रमा जोडिएका सडक सोलार बत्ती तथा विद्युतीय बत्तीहरु समय–समयमा बिग्रिने समस्या भएको उनले बताए ।

प्रतिकात्मक तस्बिर ।