काठमाडौं । मुलुकले कोरोना महामारीको सामना गरिरहेका बेला पनि प्रहरीले भने नेत्रविक्रम चन्द ‘विप्लव’ समूहप्रतिको कारबाही आक्रामक रुपमा अगाडि बढाएको छ । ०७५ फागुनमा सरकारले प्रतिबन्ध लगाएको सो समूहप्रति प्रहरी विगतको तुलनामा झन् आक्रामक देखिएको हो ।

अहिले पनि प्रहरीले विप्लव समूहविरुद्ध ‘सर्च एन्ड अरेस्ट’ अपरेसन जारी राखेको छ । मुलुकका विभिन्‍न स्थानबाट दैनिक सो समूहका नेता-कार्यकर्ता पक्राउ गर्दै आएका छन् । प्रहरी प्रवक्ता एसएसपी कुवेर कडायत राज्यले प्रतिबन्ध लगाएको समूहविरुद्ध प्रहरी सक्रिय रहनुपर्ने बताए । उनले भने, “शान्ति सुरक्षालगायत असर पार्ने जोकोहीलाई पनि हामी कानुनी दायरामा ल्याउँछौं । विप्लव समूहप्रति पनि त्यसरी नै सक्रिय भएको छ । हामी हाम्रो जिम्मेवारी निर्वाह गरिरहेका छौं ।”

प्रहरी प्रधान कार्यालयका अनुसार लकडाउनको समयमा विप्लव समूहका नेता-कार्यकर्ता बढी पक्राउ परेका छन् । हालसम्म सो समूहका १८ सय ३९ जना पक्राउ परिसकेका छन् । जसमध्ये १३५ जना पुर्पक्षका लागि जेल चलान भएका छन् । १५ सय ८१ जना भने मुद्दा दर्तापछि छुटेका छन् । केही अनुसन्धानकै क्रममा छन् । प्रहरीले पक्राउ परेका केन्द्रीय नेताहरुलाई भने अदालतबाट छुटे पनि तत्काल पक्राउ गरि अर्को मुद्दा लगाउँदै आएको छ ।

विभिन्‍न समयमा भएका विस्फोटन र आगजनीका घटनामा सो समूहका नेताहरुलाई मुद्दा लगाइँदै आएको छ ।

एक प्रहरी अधिकारीले भने, “लकडाउनको समयमा हामी थप सक्रिय भएका हौं । यस्तो मौकामा उनीहरुले आफ्ना गोप्य गतिविधि बढाउन सक्नेतर्फ हामी सचेत भएका हौं ।”

सशस्त्र द्वन्द्वको संकेतसहित आफ्ना गतिविधि अगाडि बढाइरहेको विप्लव समूहका गतिविधि भने पछिल्लो समय सुस्त छन् । खासगरी कोरोना महामारी निम्तिएसँगै सो समूहका गतिविधि सुस्ताएका हुन् । त्यसपछि विप्लव समूहले विभिन्‍न स्थानमा चन्दा संकलन, ठाउँठाउँमा विस्फोटक पदार्थ राख्‍नेलगायत कार्य गर्दै आएको थियो । सो क्रममा दर्जनौं नेता-कार्यकर्ता हतियारसहित पनि पक्राउ परेका थिए ।

लकडाउनअघि प्रहरीको नजरबाट लुक्दै आएका विप्लव समूहका नेता-कार्यकर्ता पछिल्लो समय कोरोना संक्रमणको डरले प्राय:जसो घरमै भेटिएपछि प्रहरीलाई पक्राउ गर्न सहज भएको हो । यसबाहेक प्रहरीले सो समूहका गतिविधबारे पनि सूचना संकलन जारी राखेको छ । 

हालसम्म पक्राउ परेर जेलमा रहेका विप्लव समूहका उच्च नेतामध्ये हेमन्तप्रकाश ओली ‘सुदर्शन’ हुन् । प्रहरीले पछिल्लो २ वर्षदेखि विप्लवकै खोजी गरे पनि उनलाई भने भेटाउन सकेको छैन । विप्लवकै खोजीका लागि विशेष टोली लामो समयदेखि परिचालित छ ।