चितवन । चितवनका नदीहरुमा पानीको बहाव क्रमश: घट्दै गएपछि पाँच जनाको शव फेला परेको छ । 

जिल्ला प्रहरी कार्यालय चितवनका अनुसार चितवनका विभिन्‍न ठाँउहरुमा नदीले बगाएको अवस्थामा पाँच जनाका शव भेटिएका हुन् । तीमध्ये  दुई जनाको सनाखत भएको छ भने अन्य ३  जनाको सनाखत भएको छैन । 

कार्यालयका प्रवक्ता प्रहरी नायब उपरीक्षक सूर्य बहादुर थापाका अनुसार भरतपुर महानगरपालिका वडा नम्बर १६ बस्ने  ४० वर्षीय कर्णबहादुर सुनारको सोही वडाकै झनझने भन्ने ठाउँमा शव भेटिएको छ । सुनार मंगलबार बिहान हराएका थिए । उनका आफन्तले नदी किनार वरीपरी खोजी गर्दा शव भेटिएको थियो । 

यस्तै पूर्वी चितवनको खैरहनी नगरपालिको बुढी राप्ती खोलामा पनि बगाएर ल्याएको अवस्थामा म्याग्दी अर्थुग्ले गाउँपालिका वडा नम्बर ८ बस्‍ने हाल खैरहनी नगरपालिका वडा नम्बर ५ आफन्तकोमा बस्दै आएका नरबहादुर पुन रहेका छन् ।

अन्य तीन जनाको हालसम्म सनाखत हुन सकेको छैन । प्रहरीका अनुसार  भरतपुर महानगरपालिका वडा नम्बर १ ठिमुरामा दुई जनाको शव भेटिएको छ । उनीहरु अन्दाजी १४-१५ वर्षकी एक बालिका र एक पुरुष रहेका छन् ।

त्यसैगरी भरतपुरकै वडा नम्बर १ गैँडाचोक नारायणी तिरस्थित नदी किनारमा अन्दाजी ५० वर्षीय एक महिलाको शव भेटिएको छ । 

पाँच जनाकै शव पोष्टमार्टमको लागि भरतपुर अस्पतालमा राखिएको छ । सनाखत हुन नसकेका तीनजना अन्य जिल्लामा भएको बाढी तथा पहिरोमा परेर बगाएर ल्याएको हुनसक्ने प्रहरीको अनुमान छ ।