काठमाडौं । सातै प्रदेशमा कोरोना भाइरसको शंकास्पद गरिएकाहरुको पीसीआर परीक्षणको रिपोर्ट चार दिनसम्ममा आउने भएको छ । यसअघि  कोरोना परीक्षणको रिपोर्ट ५ देखि ७ दिनसम्म लाग्‍ने गरेको थियो ।

सातै प्रदेशका सामाजिक विकास मन्त्रालयका निर्देशानालय प्रमुखहरुका अनुसार नमुना संकलन कम हुँदा परीक्षणको दर घटेको जानकारी दिएका छन् । स्वास्थ्य तथा जनसंख्या मन्त्रालयका सहप्रवक्ता डा. समीर अधिकारीका अनुसार पछिल्लो समय नमुना संकलन कम हुँदा परीक्षण कम भएको जानकारी दिए । उनका अनुसार अपराह्‍न ४ बजे सार्वजनिक गर्ने तथ्यांक पछिल्लो चौबीस घण्टाको हो । उनले भने, “नमुना संकलन कम हुँदा विभिन्‍न प्रयोगशालाहरु कामविहीन भएका छन् ।”

प्रदेश १ मा कोरोना परीक्षणको रिपोर्ट ४८ घण्टामै
प्रदेश १ को सामाजिक विकास मन्त्रालयअन्तर्गतको प्रदेश प्रयोगशाला प्रमुख डा. देवेन्द्र यादवले पछिल्लो एक सातादेखि नमुना संकलन भएको बताए । क्‍वारेन्टिन, होल्डिङ सेन्टरमा पनि विदेशबाट आएका व्यक्तिहरु कम हुने र वर्षाको समय हुँदा पनि  नमुना संकलन कम भएको उनले  जानकारी दिए । उनले भने, “पछिल्लो एक सातादेखि कोरोनाको आशंकामा संकलन गरिएका नमुना कम भएसँगै रिपोर्ट पनि ४८ घण्टामै दिन सुरु गरिएको छ ।”

उनका अनुसार यस प्रदेशमा तीनवटा प्रयोगशालाबाट पीसीआर परीक्षण भइरहेको छ । जसमा  कोसी प्रादेशिक अस्पताल, बीपी कोइराला स्वास्थ्य विज्ञान प्रतिष्ठान र प्रादेशिक जनस्वास्थ्य प्रयोगशाला छन् । यी प्रयोगशालाबाट दैनिक दुई सयदेखि २५० वटासम्म नमुना परीक्षण हुने गरेको छ ।

पहिला धेरै नमुना संकलन हुँदा ७२ घण्टापछि मात्र स्वाब परीक्षणको रिपोर्ट दिने गरेकामा अहिले ढिलोमा पनि ४८ घण्टामै रिपोर्ट दिने गरेको उनको भनाइ छ । सातादिन अघिसम्म दैनिक ५ सयदेखि ७ सयसम्म नमुना ‘होल्ड’  हुने गर्थ्यो । तर पछिल्लो एक सातादेखि दैनिक ६ सयदेखि ७ सय नमुना मात्र संकलन हुने गरेको  प्रदेश प्रयोगशालाले जनाएको छ ।

प्रदेश २ मा कोरोना परीक्षणको रिपोर्ट चार दिनमै
प्रादेशिक स्वास्थ्य निर्देशनालयका वरिष्ठ जनस्वास्थ्य अधिकृत विजयकुमार झाले कोरोनाको आशंका गरिएका व्यक्तिको पीसीआर परीक्षणको रिपोर्ट अहिले ३ देखि ४ दिनमा  दिने गरेको बताए । उनका अनुसार अहिले भारतबाट फर्किने संख्यामा कमी र कोरोनाको शंकास्पद संक्रमितको संख्या घटेर सोहीअनुरूप नमुना  संकलन भएको जानकारी दिए । 

वाग्मती प्रदेशमा चौबीस घण्टामै कोरोनाको पीसीआर रिपोर्ट
वाग्मती प्रदेशमा कोरोना भाइरसको शंकास्पद नमुनाहरुको पीसीआर रिपोर्ट चौबीस घण्टामै दिन सुरु गरिएको वाग्मती प्रदेश सामाजिक विकास मन्त्रालयले जनाएको छ । मन्त्रालयका कोभिड प्रवक्ता डा. पुरुषोत्तम सेढाईंका अनुसार कोरोना आशंकामा नमुना संकलन गरी प्रयोगशालामा ल्याएको चौबीस घण्टामै रिपोर्ट उपलब्ध हुन्छ ।

उनले भने, “राष्ट्रिय जनस्वास्थ्य प्रयोगशालाबाहेक यस प्रदेशका अन्य प्रयोगशालामा दैनिक चार सयसम्म नमुना परीक्षण हुँदै आएको छ ।” पहिला नमुना होल्डमा हुने गरेकामा पछिल्लो एक सातादेखि नमुना संकलन नै कम भएको र संकलन भएका सबै परीक्षण हुने गरेको सेढाईंले जानकारी दिए ।

स्वाब कम भएर परीक्षण घटेको मन्त्रालयको दाबी, प्रदेश भन्छन् - स्वाब संकलन घटेकै छैन

कोरोना संक्रमण घटेको देखिएको र लकडाउन खुकुलो छ, भनेर हेलचेक्रयाइँ गर्न नहुने पनि उनको सुझाव छ । उनले भने, “थोरै भए पनि संक्रमण रोक्न सकेका छौं, जसले संक्रमण घटेको छ तर हामी जोखिम मुक्त भने छैनौँ ।”

त्यसैगरी,राष्ट्रिय जनस्वास्थ्य प्रयोगशालाका सूचना अधिकारी राजेकुमार गुप्ताका अनुसार पछिल्लो समय स्वाब संकलन घटेको छ । उनले भने, “दुई हजारसम्म नमुना परीक्षण गर्न सक्ने क्षमता छ तर स्वाब कम आएको छ ।” उनले दैनिक पाँच सयदेखि आठ सयको नमुना परीक्षण हुने गरेको पनि जानकारी दिए । उनका अनुसार अहिले परीक्षण भइरहेको स्वाब पनि क्यान्टक ट्रेसिङमा परेका र विभिन्‍न प्रदेशबाट आएका  स्वाब छन् ।

गण्डकी प्रदेशमा चौबीस घण्टामै पीसीआर रिपोर्ट
गण्डकी प्रदेशको सामाजिक विकास मन्त्रालयअन्तर्गतको स्वास्थ्य निर्देशानालय प्रमुख डा. विनोदविन्दु शर्माले हाल कोरोना परीक्षणको रिपोर्ट चौबीस घण्टामा दिने गरेको जानकारी दिए । उनले दिनको दुई सयदेखि २५०सम्म नमुना संकलन हुने गरेको बताए । उनले भने, “अहिले नमुना संकलन गरेको चौबीस घण्टामा परीक्षण रिपोर्ट दिने गरेका छौँ ।” उनका अनुसार क्षयरोग केन्द्रमा रहेका दुईवटा पीसीआर मेसिन र पोखरा स्वास्थ्य विज्ञान प्रतिष्ठानमा रहेको एउटा पीसीआर गरी तीनवटा पीसीआर मेसिनबाट कोरोना परीक्षण हुँदै आएको छ । 

प्रदेश ५ मा पीसीआर परीक्षणको रिपोर्ट ३ देखि ४ दिनमा पाइने
प्रदेश ५ सामाजिक विकास मन्त्रालयअनतर्गतका स्वास्थ्य निर्देशानालय प्रमुख डा. उमाशंकर प्रसाद चौधरीले कोरोना परीक्षण गर्न नमुना संकलन गरेको ३ देखि ४ दिनमा परीक्षणको रिपोर्ट आउने जानकारी दिए । उनले भने, “पहिला धेरै नमुना संकलन हुन्थ्यो क्‍वारेन्टिनमा पनि धेरै व्यक्ति थिए । अहिले क्‍वारेन्टिन र आइसोलेनमा मानिसहरु कम हुँदा नमुना संकलन पनि घटेको छ ।”

उनका अनुसार यो प्रदेशमा चारवटा प्रयोगशालबाट आठ सयसम्म नमुना परीक्षण हुने गरेको छ । 

कर्णाली प्रदेशमा दुई दिनमै रिपोर्ट आउने
कर्णाली प्रदेश सामाजिक विकास मन्त्रालय, स्वास्थ्य सेवा निर्देशनालयकी निर्देशक रीता भण्डारी (जोशी) ले कोरोना परीक्षणको रिपोर्ट एकसाता यता एकदेखि २ दिनमै उपलब्ध गराएको बताएकी छन् । आज नमुना संकलन गरिएको छ भने बेलुका परीक्षणमा हालेर भोलि बेलुका पीसीआर रिपोर्ट दिने गरिएको उनले जानकारी दिइन् । यस प्रदेशमा दैनिक ५ सयसम्म नमुना संकलन भएर सबै परीक्षण हुँदै आएको छ ।

उनका अनुसार यस प्रदेशमा चारवटा पीसीआर मेसिनबाट कोरोना परीक्षण हुने गरेको छ । जसमा कर्णाली स्वास्थ्य विज्ञान प्रतिष्ठान, सुर्खेत प्रादेशिक अस्पताल, दैलेख स्वास्थ्य कार्यालयमा  र चौजाहारी स्वास्थ्य संस्थाबाट कोरोना परीक्षण हुँदै आएको छ । यस प्रदेशमा नमुना होल्ड अहिले नरहेको भण्डारीले जनाइन् ।

सुदूरपश्‍चिम प्रदेशमा पीसीआर रिपोर्ट ३ दिनदेखि ४ दिनमा आउने
सामाजिक विकास मन्त्रालयका स्वास्थ्य शाखा प्रमुख नरेन्द्र कार्कीले कोरोनाका शंकास्पद व्यक्तिहरुको पीसीआर परीक्षणको रिपोर्ट अहिले ३ दिनदेखि  ४ दिनमा दिने गरेको बताए । नमुना संकलन धेरै भए काठमाडौं पठाउनुपर्ने अवस्था आए परीक्षणको रिपोर्ट एक सातामा लाग्‍ने उनले जानकारी दिए । उनले भने, “दैनिक यति नै नमुना संकलन गरिन्छ भन्‍ने छैनन्, तर आवश्यकता र अवस्था हेरेर परीक्षण गदै आएका छौं ।”

उनका अनुसार कोरोना परीक्षण घटेको छैन । धनगढीस्थित सेती प्रादेशिक अस्पतालको प्रयोगशालामा ३ सयसम्म परीक्षण हुने गरेको छ, भने ५० देखि ६० वटासम्म डडेलधुरा अस्पतालको प्रयोगशालामा हुने गरेको उनले जानकारी दिए ।

एक हजार ६५७ वटा नमुना परीक्षणको पालो कुरेर बसेका स्वाब (होल्ड) रहेको उनले बताए । उनका अनुसार पहिला ३ हजारको हाराहारीमा नमुना होल्ड हुँदा परीक्षण गर्न राष्ट्रिय जनस्वास्थ्य प्रयोगशाला पठाउने गरिएको थियो ।

“कोरोना संक्रमण समुदायमा फैलिएको छैन, भारतबाट आएकाहरु  क्‍वारेन्टिनमा राख्‍ने गरिन्छ, क्‍वारेन्टिनमा बसेको १० दिनपछि हामीले परीक्षण गछौँ,” उनले भने, “भारतबाट पनि दैनिक आठ सयदेखि एक हजारसम्म आउने गरेका छन् ।”