काठमाडौं । नेपालमा कोरोनामो जोखिम बढ्दो छ । दैनिक संक्रमितको संख्या थपिएको छ । कुनै पनि संकटमा अग्रपंक्तिमा आउने भनेको सुरक्षा निकाय हो । त्यसमा पनि नेपाल र सशस्त्र प्रहरीको भूमिका बढी देखिन्छ ।

तर सुरक्षा निकायभित्रै कोरोना संक्रमित देखिन थालेपछि आन्तरिक रूपमै चुनौती थपिएको छ । हालसम्म नेपाल प्रहरीका तीन र सशस्त्र प्रहरीका पनि तीन जनामा कोरोना संक्रमण पुष्टि भएको दुवै संगठनको मुख्यालयले जनाएको छ ।

नेपाल प्रहरीका प्रवक्ता डीआईजी नीरज शाही प्रहरी स्वास्थ्य सुरक्षाका साथ ड्युटीमा खटिए पनि उच्च जोखिम रहेको बताउँछन् । उनले भने, “हामीलाई मात्रै होइन, चुनौती सबैतिर छ । आम समयभन्दा यो अप्रत्यासित समय हो ।  नागरिक र राज्यप्रतिको जिम्मेवारीमा हामी कहिल्यै विचलित हुँदैनौं । कोरोनाकै कारण एकजनाको ज्यान गएपछि आन्तरिक रूपमा थप सतर्कता अपनाएका छौं ।”

ब्यारेकमा जाँदा, ड्युटीमा खटिँदा, पक्राउ वा नियन्त्रणमा लिँदा उपलब्ध स्वास्थ सामग्रीको प्रयोग गर्दै आएको प्रवक्ता शाही बताउँछन् । यसबाहेक बिदामा गएकाहरू फर्किंदा अनिवार्य क्वारेनटाइन, शंका लागे स्वास्थ्य जाँचसमेत गरिँदै आएको छ । प्रवक्ता शाहीले भने, “जनताबीच विभिन्न कारणले पुग्नैपर्छ । यस्तो अवस्थामा सामाजिक दूरी, जोखिम न्यूनीकरण गर्ने उपाय सकेसम्म अपनाउँछौं ।” नेपाल प्रहरीले देशभर दुई सयको संख्यामा आइसोलेसन वार्ड निर्माण गरेको छ । यसबाहेक प्रहरी कर्मचारीको स्वास्थ्य अवस्थाको नियमित अनुगमनसमेत भइरहेको प्रवक्ता शाहीले बताए ।

सशस्त्र प्रहरी बलका प्रवक्ता डीआईजी प्रवीण श्रेष्ठले आमनागरिकले अपनाउने सुरक्षा सावधानी नै आफूहरूले अपनाएको बताए । कार्यक्षेत्रमा खटिँदा कतिपय अवस्थामा पीपीईसहित अन्य स्वास्थ्य सामग्रीको समेत प्रयोग गर्ने गरेको बताए ।

सीमा सुरक्षा, अन्य विभिन्न स्थानमा जाँचलगायत शान्ति सुरक्षामा सशस्त्र प्रहरी परिचालन भएको श्रेष्ठ बताउँछन् । लकडाउनको अवधिमा देशभर ३१ हजार बढी जनशक्ति परिचालन गरिएको उनले बताए । नेपाल प्रहरीजस्तै बिदाबाट फर्किएकालाई अनिवार्य क्वारेनटाइन र स्वास्थ्य जाँच गरिँदै आएको उनले बताए । सशस्त्र प्रहरी अग्रपंतिमा रहेर काम गर्नुपर्ने भएकाले स्वास्थ्य चुनौती रहेकोसमेत श्रेष्ठ बताउँछन् ।