जनकपुर । प्रदेश २ मा कोरोना संक्रमितको संख्या बढेपछि कोरोना अस्पतालको संख्या वृद्धि गर्न प्रदेश सरकार अग्रसर भएको छ । 

हाल वीरगन्जस्थित नारायणी अस्पताल र जनकपुरको प्रादेशिक अस्पतालमा दुई सयको दरले शय्या संख्या उपलब्ध रहे पनि संक्रमितको संख्या बढ्न सक्ने सम्भावनालाई ध्यानमा राखेर पूर्वतयारीमा जोड दिनुपर्ने प्रदेश प्रहरी प्रमुख डीआईजी धीरजप्रताप सिंहले बताए । मंगलबार मात्रै यस प्रदेशमा ६३ संक्रमित थपिएपछि अहिले ९५ जना पुगेका छन् । उनीहरूमध्ये एकजना निको भएर घर फर्किएका छन् र दुईजना जनकपुर अस्पतालमा छन् भने बाँकी ९२ जना वीरगन्जमा उपचारार्थ भर्ना छन् । 

प्रदेशमा संक्रमितको संख्यामा अप्रत्यासित बढेपछि प्रदेश सरकार थप गम्भीर भएको हो । बुधबार प्रदेशस्तरीय सुरक्षा संयन्त्रको बैठक बसेर सरकारले थप सतर्कता अपनाउँदै अगामी योजनाबारे छलफल गरेको डीआईजी सिंहले बताए । प्रदेश २ का सबै (आठवटै) जिल्ला भारतीय सीमासँग जोडिएका छन् । यसले जोखिम पनि बढेको उनको भनाइ हो । 

खुला सीमानाको दुरुपयोग नियन्त्रण गर्न नसक्दा यतिबेला जोखिम झनै बढेको उल्लेख गर्दै डीआईजी सिंहले बाह्रखरीसँग भने, “पारिबाट कसैलाई वारि प्रवेश गर्न नदिन दिनरात सुरक्षाकर्मी तैनाथ छन् । सकेसम्म सीमा सिल गरिराख्ने प्रयासमा प्रहरी हो तर पनि चोरबाटो प्रयोग गरी मध्यराति नेपाल भित्रिनेहरू हाम्रो चुनौती हो ।” उक्त चुनौती सामना गर्न आमनागरिकको साथ र समर्थनको आवश्यकता औंल्याउँदै उनले कोरोना संक्रमणलाई फैलिन नदिन बाहिरबाट आउनेलाई अनिवार्य क्वारेन्टाइनमा बस्न र सामाजिक दूरी कायम गर्न आग्रह गरे । 

बैठकको अगुवाइ गरेका आन्तरिक मामिला तथा कानुनमन्त्री ज्ञानेन्द्र यादवले भारतबाट सुरक्षाकर्मीको आँखा छलेर भित्रिने व्यक्तिहरू कोरोना संक्रमण नियन्त्रण प्रक्रियाको मुख्य चुनौती रहेको बताए । “सुरुमा वीरगन्जको मस्जिदमा भेटिएको भारतीय जमातीले प्रदेशमा कोरोना संक्रमण गराएको देखियो,” उनले भने, “पछिल्लो समय देखिएको अवस्थाले धेरै सचेत र सावधानी अपनाउनुपर्ने आवश्यकता छ ।” यो परिवेशमा कसरी अघि बढ्ने भन्ने विषयमा छलफल भएको उनले बताए । 

मन्त्री यादवले पर्सा जिल्लालाई रेडजोन घोषणा गरी पूर्ण सिल गरिसकेको जानकारी दिँदै अन्य जिल्लाहरूमा पनि संक्रमितहरूको कन्ट्याक्ट टे«सिङ गरेर जाँचमा तीव्रता दिने र सम्बन्धित क्षेत्रलाई सिल गर्दै जाने रणनीति लिएको जनाए । 

धनुषाका प्रमुख जिल्ला अधिकारी कोषहरि निरौलाले भारतीय सीमाको निगरानीमा थप सुरक्षाकर्मी परिचालन गर्ने, नेपाल प्रवेश गरिसकेकाहरूलाई उचित व्यवस्थापन गर्ने, क्वारेन्टाइन सञ्चालन प्रक्रियालाई प्रभावकारी बनाउने र क्वारेन्टाइनको संख्या थप गर्नेलगायत विषयमा पनि बैठकमा छलफल भएको जनाए । उनले आवश्यकता परेका बेला सीमा क्षेत्रमा सेनालाई समेत परिचालन गर्न सकिने बताउँदै विपतको परिस्थिति ध्यानमा राखेर आमनागरिकलाई अझ गम्भीर भएर सतर्कता अपनाउन आग्रह गरे ।