जनकपुर । वीरगन्ज महानगरपालिका –३ मा बुधबार एउटै परिवारका १७ जनालाई कोरोना संक्रमण भएको पुष्टि भएपछि स्थानीयमा त्रास बढेको छ ।  स्वास्थयकर्मी आत्तिएका छन् । नगर प्रमुख चिन्तामा छन् । प्रशासन र प्रहरी दबावमा छ ।  गएको आइतबार सोही स्थानका ३६ वर्षीय एक पुरुषमा कोरोना संक्रमण देखियो । उनलाई तत्काल वीरगन्जस्थित नारायणी कोरोना अस्पतालको आइसोलेशनमा राखेर उपचार थालियो ।

उनको परिवारका सबै सदस्यलाई होम क्वारेन्टाइनमा बस्न लगाइयो ।  एक जनामा संक्रमण पुष्टि भएपछि परिवारका अन्य सबै सदस्यहरुको पनि स्वाब संकलन गरेर राष्ट्रिय प्रयोगशाला पठाइयो ।  तिनै परिवारका सबै (१७ जना) सदस्यमा संक्रमण फैलिइसकेको बुधबार स्वास्थ्य तथा जनसंख्या मन्त्रालयले पुष्टि गरेको हो ।

कोरोना संक्रमितहरुमा २ महिने शिशुदेखि ६६ वर्षसम्मका नागरिक छन् ।  पहिलो पटक पीसीआर जाँच भएको आधारमा गत आइतबार संक्रमित देखिएका ती पुरुष वीरगन्ज –३ का वडा अध्यक्ष बैँजु स्वर्णकारका सहयोगी कार्यकर्ता हुन् । वडा अध्यक्ष स्वर्णकारका सहायकजस्तै भएर उनीसँगै घुमिरहने व्यक्तिमा संक्रमण पुष्टि भएदेखि नै वीरगन्जका धेरै नागरिकमा फैलिएको हुनसक्ने अनुमान सहजै लाउन सकिने महानगर प्रमुख विजय सरावगी बताउँछन् । 

“हुन त मैले डेढ महिना अगावैदेखि वीरगन्जमा पीसीआर जाँचको गति बढाउन माग गरिरहेको छु,” सरावगीले बाह्रखरीसँग भने, “सहयोगको लागि प्रदेश सरकारलाई घच्घच्याएँ, संघ सरकारलाई अनुनय गरेँ । कसैले सुने पो !” 

तीनसाता अगाडि वीरगन्ज आइपुगेको पीसीआर मेशिन आवश्यक उपकरण र प्रविधिको अभावमा त्यसै थन्केको र निरन्तरको प्रयासबाट बल्ल बुधबारदेखि सञ्चालनमा आएको बताउँदै उनले दैनिक रुपमा पीसीआर जाँचको संख्या बढाउनुको विकल्प नरहेको जिकिर गरे ।  

वीरगन्जको शंकास्पद बस्तीमा तत्कालै पीसीआर जाँच गरियो भने पनि हजारदेखि दुई हजार व्यक्तिमा संक्रमण पुष्टि हुनसक्ने अनुमान व्यक्त गर्दै सरावगीले जाँचमा ढिलाई भए पाँच हजारभन्दा बढ्न सक्ने दाबी गर्छन् । 

“वीरगन्जमा पाँच हजारदेखि दस हजार व्यक्तिलाई तत्काल पीसीआर जाँच गर्नुपर्ने आवश्यकता छ,” महानगर प्रमुख सरावगीले भने, “तीमध्ये दसदेखि बीस प्रतिशत व्यक्तिमा कोरोना संक्रमण हुनसक्ने अनुमान छ । जाँचमै ढिलाई भए यो संख्या तीन गुणासम्म बढ्न सक्छ ।”

तीनवटा भन्सार नाका रहेको वीरगन्जमा दैनिक सयौँको संख्यामा मालवाहक सवारी सीमा वारिपारी ओहोरदोहोर गरिरहेका छन् । देशमा आयात हुने सामानको करिब ५० प्रतिशत आपुर्ति यही नाकाबाट भइरहेको छ । 

काठमाडौंलाई आवश्यक सामान आपुर्ति गर्नमात्रै मतलब रहेको टिप्पणी गर्दै सरावगीले थपे, “वीरगन्जलाई जेसुकै होस् काठमाडौंमा बस्ने सरकारलाई के मतलब ?” वीरगन्जलाई लिएर बढी नै राजनीति भइरहेको उल्लेख गर्दै उनले संघ र प्रदेश सरकारलाई जानकारी हुँदाहुँदै पनि नाकाको नियमन गर्न गम्भीर नदेखिएको आरोप लगाए । 

वीरगन्ज महानगरपालिकालाई यतिबेला पैसाको आवश्यकता नरहेको प्रष्ट्याउँदै सरावगीले बढीभन्दा बढी पीसीआर जाँच गर्ने व्यवस्था मिलाइदिन माथिल्ला सरकारसँग आग्रह गरे । 

“विश्वभर रहेको समस्याको कारण आवश्यक उपकरण आपुर्ति गर्न देशलाई कठिनाइ भोग्नु परिरहेको हुनसक्छ । तर, सरकारले अन्यत्र कतै नअल्झेर पीसीआर जाँचको गति बढाउनका लागि ध्यान केन्द्रित गर्न मेरो बिन्ती छ,” उनले भने । 

महानगरको दक्षिण क्षेत्र पूर्ण सील

एकैदिन एउटै परिवारका १७ जनामा कोरोना संक्रमणको पुष्टि भएलगत्तै बुधबार अपराह्न बसेको जिल्ला सुरक्षा समितिको बैठकले महानगरको दक्षिणी क्षेत्र पूरै सील गर्ने निर्णय गरेको छ । जिल्लाको वर्तमान अवस्था विश्लेषण र कोरोना संक्रमण नियन्त्रण एवं रोकथामका प्रयासहरुको समीक्षा गर्न बसेको बैठकले वडा नम्बर १, २ र ३ का प्रमुख इलाकाहरु सील गर्ने निर्णय गरेको हो ।

पूर्वमा रजत जयन्ती चोक, इदगाह चोक, छप्कैया बीट चोक र मालपोत चोक, पश्चिममा छप्कैया बजार चोक, सिर्सिया पुल चोक र सिर्सिया भन्सार, उत्तरमा एमबीएस स्कुल, पानीट्यांकी चोक, युक्ति सुधार केन्द्र र बही पुल तथा दक्षिणमा पर्ने वडा १ र २ सँग जोडिएको भारतीय सीमाबीचको भागलाई पूर्ण रुपमा सील गरिएको हो । 

यस क्षेत्रमा कुनै पनि सवारीसाधन सञ्चालन गर्न निषेध गरिएको छ । 

त्यस्तै, संक्रमित व्यक्तिहरुको सम्पर्कमा आएका सबैको शिघ्र कन्ट्याक्ट ट्रेसिङगरी चेकजाँचको कामलाई तीव्र पार्ने, पावरहाउस चोकदेखि रजत जयन्ती चोकसम्म अतिआवश्यक सवारीबाहेक साइकलसम्मका साधन चलाउन पूर्ण रुपले प्रतिबन्ध गर्ने र औषधी उपचार तथा अतिआवश्यक खाद्यवस्तु खरिद गर्न बाहेक कुनै पनि व्यक्तिलाई घरबाहिर निस्किन निषेध गर्ने निर्णय बैठकले गरेको छ ।