काठमाडौं । रौतहट जिल्ला चन्द्रपुर नगरपालिकामा निर्माणाधीन नेपालकै पहिलो महिला फुटबल एकेडेमी (टेक्निकल सेन्टर) निर्माण रोक्न माग गर्दै सर्वोच्च अदालतमा रिट दायर भएको छ ।

अखिल नेपाल फुटबल संघ (एन्फा) ले अनधिकृत रूपमा निर्माण थालेको भन्दै त्यसविरुद्ध अधिवक्ता सुजित केसीले मंगलबार रिट दायर गरेका हुन् । रिटमा वन तथा वातावरण मन्त्रालय, राष्ट्रिय खेलकुद परिषद्, फुटबल संघ लगायतलाई विपक्षी बनाइएको छ । 

रिटमा एन्फा अध्यक्ष कर्माछिरिङ शेर्पाले कार्यसमिति समेतलाई जानकारी नदिई फिफाबाट प्राप्त ४ करोडभन्दा धेरै नेपाली रुपैयाँ नेपालकै पहिलो महिला फुटबल एकेडेमी (टेक्निकल सेन्टर) निर्माण गर्ने भन्दै सरकारी वनक्षेत्रको जग्गा कब्जा गरी निर्माण सुरु गराएका उल्लेख छ ।

उक्त खेलमैदानमा एकेडेमी निर्माणका लागि कानुन बमोजिमको निर्णय नभएको, वातावरणीय प्रभाव मूल्यांकन नगरिएको, अध्यक्ष र महासचिवले कार्यसमितिलाई जानकारी नगराएको भन्दै निर्माण रोक्न माग गरिएको छ । 

वनक्षेत्रको जग्गा अनाधिकृत भोगचलन गर्न दिई मौन स्वीकृति दिएको, अखिल नेपाल फुटबल संघ, वन उपभोक्ता समितिका अध्यक्ष, नगरपालिकाका मेयर, वडा अध्यक्षसमेतले जानीजानी वनक्षेत्रको सरकारी जग्गालाई कानुनी प्रक्रिया र वातावरणीय मापदण्डसमेत पूरा नगरी, गैरकानुन रूपमा २५ वर्षसम्म भोगचलन गर्न दिए लिएको भन्दै गैरकानुनी सम्झौता र सोही सम्झौताको आधारमा एन्फा र न्यू ड्राइगन नयाँ युग जेभीबीच भएको गैरकानुनी निर्माण सम्झौता समेत बदर गर्नुपर्ने रिटमा उल्लेख छ ।