काठमाडौं । अख्तियार दुरुपयोग अनुसन्धान आयोगले प्रहरीलाई घूस दिन खोज्नेदेखि घूस खाने प्रहरी र उत्तरपुस्तिका साट्ने परीक्षा निरीक्षककविरुद्ध आरोपपत्र दायर गरेको छ ।

आयोगका प्रवक्ता प्रदीपकुमार कोइरालाका अनुसार बुधबार ५ आरोपपत्र विशेष अदालत काठमाडौंमा दायर गरिएको हो । वालिङ नगरपालिका ८ का जहरूदिन तेलीले वडा प्रहरी कार्यालय वालिङ, स्याङ्जाका कार्यालय प्रमुख प्रहरी निरीक्षकलाई कार्यकक्षमै १५ हजार घूस दिन खोजेपछि प्रहरीले नियन्त्रणमा लिएको थियो । तेलीविरुद्ध प्रहरी निरीक्षकलाई घूस दिएको पुष्टि भएको भन्दै आरोपपत्र दायर भएको हो । 

त्यस्तै, कर्णाली प्राविधिक शिक्षालयका परीक्षा सहायक तथा प्राविधिक शिक्षा तथा व्यावसायिक तालिम परिषद्को परीक्षाका निरीक्षक चन्द्रसिंह खत्रीविरुद्ध पनि आरोपपत्र दायर भएको छ । प्राविधिक शिक्षालयमा सञ्चालित कृषितर्फको डिप्लोमा प्रथम वर्षको बाह्य परीक्षामा परीक्षार्थी गंगाराज शाहीका उत्तरपुस्तिकाहरू परिवर्तन गरी अनियमितता गरेको भन्ने व्यहोराको उजुरी अनुसन्धान गर्दा दोषी पाइएको भन्दै खत्री र परिक्षार्थी गंगाराज शाहीविरुद्ध आरोपपत्र दायर भएको छ ।  प्रश्नपत्रको गोपनीयता भंग तथा परीक्षाको परिणाम फेरबदलसम्बन्धी कसुर गरेको पुष्टि हुन आएकाले शाही र खत्रीलाई भ्रष्टाचार निवारण ऐन, २०५९ को दफा १३ बमोजिमको सजाय हुन मागदाबी लिइएको छ । त्यस्तै, इलाका प्रहरी कार्यालय हरिवन सर्लाहीका प्रहरी निरीक्षकलाई घूस दिन खोज्ने श्यामकुमार श्रेष्ठविरुद्ध पनि आरोपपत्र दायर भएको छ ।

त्यस्तै, जिल्ला प्रहरी कार्यालय बारामा कार्यरत जवान सरोजकुमार यादवविरुद्ध पनि आरोपपत्र दायर भएको छ । घरेलु मदिरा बिक्री वितरणमा सहजीकरण गरिदिने भनी सेवाग्राहीसँग यादवले १५ हजार रुपैयाँ घूस लिएका थिए । उता, जन्मदर्ताको प्रमाणपत्र बनाइदिन घूस मागेको भन्दै सप्तरी महादेवा गाँउपालिका ६ का वडासचिव नायब सुब्बा नवोनाथ मिश्रविरुद्ध पनि आरोपपत्र दायर भएको छ । अख्तियारले बुधबार विशेष

अदालतमा दायर गरेको आरोपपत्रमा जन्मदर्ता प्रमाणपत्र बनाइदिने प्रयोजनका लागि सेवाग्राहीसँग दुई लाख रुपैयाँ घूस बापतको रकम लिइसकेको अवस्थामा नियन्त्रणमा लिइएको उल्लेख छ ।