चितवन । जिल्लामा रहेका ६१ भूकम्प प्रभावितको नाम सूचीबाट हटाउन स्थानीय तहले सिफारीस गरेका छन् । राष्ट्रिय पुर्ननिर्माण प्राधिकरण जिल्ला आयोजना कार्यान्वयन एकाइ अनुदान व्यवस्थापन तथा स्थानीय पूर्वाधार भरतपुरका अनुसार भूकम्प प्रभावितमध्ये २ जनाको प्रथम किस्ताबापतको रकम फिर्ता गर्न कबुलियतीनामा समेत प्राप्त भएको छ । 

नाम सूचीबाट हटाउन सिफारिस हुनेमा दोहोरो नाम परेका लाभग्राहीहरू, वडामा सम्पर्कमा नआएका, घर पुनर्निर्माण नगर्ने सोचमा रहेका, भूमिहीन भएका र सार्वजनिक जग्गामा पहिलेदेखि नै बस्दै आएका रहेको कार्यालयका प्रमुख राजेन्द्र कार्कीले जानकारी दिए । उनका अनुसार सूचीबाट हटाउन सिफारिस गरिएकामा खैरहनी नगरपालिका, कालिका नगरपालिका र इच्छाकामना गाउँपालिकाका भूकम्प प्रभावितहरू छन् । यस्तै भूकम्पपछि प्राविधिकहरू नखटिँदै निर्माण सम्पन्न भएका ३१ घरको विषयमा भने कार्यालयले केन्द्रमा विवरण पठाएको कार्कीले जानकारी दिए ।

जिल्लामा पाँच सय ९६ भूकम्प प्रभावित थपिएका छन् । कार्कीका अनुसार थपिनेमा ३ सय ७ पुनर्निर्माणतर्फ र २ सय ८९ आंशिक क्षतितर्फका छन् । कार्यालयले गत जेठ मसान्तसम्म लिएको गुनासोका आधारमा उनीहरूलाई लाभग्राहीको सूचीमा थपिएको हो ।  कार्यालयका इन्जिनियर सुजन नेपालका अनुसार सो समयसम्म ९ हजार ५ सय ६९ जनाको गुनासो केन्द्रमा पठाइएको थियो । त्यहीमध्येबाट प्राधिकरणले लाभग्राही थप गरेको हो । उनका अनुसार थप भएका लाभग्राहीकोमा प्राविधिक जाने काम सुरु भएको छ । 

यस्तै कार्यालयले पुनर्निर्माणको ६९ प्रतिशत काम पूरा भएको जनाएको छ । ७ हजार ४ सय ६० लाभग्राहीमध्ये ४ हजार ७ सय २२ जनाले तेस्रो किस्ता बापतको रकम निकासा गरिसकेका छन् । यस्तै दोस्रो किस्ता बापतको रकम ५ हजार ६ सय ८ जनाले लिइसकेका छन् । पहिलो किस्ता सम्झौता गर्नेको संख्या ६ हजार ७ सय ८४ छ । लाभग्राहीको संख्या थप भई हाल ७ हजार ७ सय ६७ पुगेको छ । उनीहरूले पहिलो किस्ताबापत ५० हजार, दोस्रो किस्ता बापत १ लाख ५० हजार र तेस्रो किस्ता बापत १ लाख रुपैयाँ पाउनेछन् । यस्तै आंशिक १ हजार ४६ मध्ये ६ सय ५४ जनाको रकम निकासा भइसकेको छ । आंशिकतर्फ लाभग्राही १ हजार ३ सय ३५ पुगेको नेपालले जानकारी दिए ।

आंशिक रूपमा क्षति भएकाहरूको हकमा प्रवलीकरणको काम गर्न कठिन भएको इन्जिनियर सुवास न्यौपानेले जानकारी दिए । उनका अनुसार प्रवलीकरणमा परेका घरका धनीहरू नै नयाँ निर्माणका लागि तयार हुने तर प्रवलीकरणका लागि तयार नहुने गरेका कारण समस्या आएको हो । प्रवलीकरणका लागि रकम निकासा भए पनि काम भने जम्मा ३ वटा घरमा मात्रै भएको उनले बताए । अन्यको लगत प्रथम किस्ता बापतको रकम फिर्ता गर्न कठिन भएको कार्यालयले जनाएको छ । जिल्लामा २०७२ मा आएको भूकम्पले ८ बस्ती असुरक्षित रहेको पाइएको छ ।

जसमा १ सय १ घरधुरी असुरक्षित छन् । उनीहरूमध्ये ६२ घरधुरीलाई सुरक्षित बस्तीका लागि जग्गा उपलब्ध गराइएको छ । ३८ घर अझै जोखिम स्थानमै बसोबास गर्दै आएको कार्यालयको तथ्यांकले जनाएको छ ।