पोखरा । नेपालमा हुने धेरैजसो फ्रेन्चाइजी लिगहरुमा फाइनलमा पुग्ने टोलीमध्ये एक शरद भेषावकर नेतृत्वको टोली हुन्छ ।  शरदले कप्तानी गरेको हरेक टोली हालसम्म नेपाली फ्रेन्चाइजी लिगहरुको फाइनलमा पुग्न सफल छ ।  शरद नेपाली फ्रेन्चाइजी क्रिकेट प्रतियोगितामा सफल कप्तानको रुपमा पनि चिनिन्छन् । 
शरदको फाइनल छबि भने योपटक समाप्त भएको छ । सोमबार भएको पीपीएलको आफ्नो अन्तिम लिग खेलमा शरदको टोली धनगढी ब्लुजसँग फराकिलो अन्तरले पारजित हुँदै पोखराको फाइनल यात्रामा पूर्णविराम लाग्यो ।  पोखरा पीपीएलको पहिलो संस्करणको उपाधि विजेता टोली हो । पोखराले गत सिजन फाइनलमा पारसको टोली चितवन राइनोजलाई पराजित गर्दै उपाधि उचालेको थियो । 

पहिलोपटक फाइनल नपुग्दा समर्थक भने खुसी छैनन् । त्यसो त अघिल्लो संस्करणको विजेता टोली लिग चरणबाटै बाहिरिनु अचम्मको कुरा पनि हो ।  त्यसमाथि शरदको टोली फाइनलमा पुग्न नसक्नु अर्काेतर्फ आफैँमा आचार्यजनक कुरा भएको खेलाडीहरु नै बताउँछन् । लिग चरणबाटै बाहिरिएपछि शरदले हरेक लिगमा फाइनल पुग्नैपर्छ भन्ने नहुने बताए । 

उनले टी–ट्वान्टी क्रिकेटमा जे जस्तो पनि नतिजा आउने भएकाले त्यसलाई सहज रुपमा लिनुपर्ने बताए ।  “मैले योपटक फाइनलमा स्थान बनाउन सकिन । सबै फ्रेन्चाइजी प्रतियोगितामा फाइनल पुग्छु भन्ने छैन । योपटक फाइनल पुग्न सकिन यसलाई मैले केही नयाँ कुरा सिक्ने अवसरको रुपमा लिएको छु । नयाँ संस्करणमा नयाँ तरिकाले आउने छु,” शरदले भने । 

घरेलु टोलीको रुपमा रहेको शरदको टोली फाइनलमा नपुग्दा यो संस्करणको फाइनल खेलमा भने केही रोमाञ्चकता घट्ने अनुमान गरिएको छ ।  पीपीएलको लिग चरणको अन्तिम दुई खेल बाँकी रहँदा दुई टोलीले अघिल्लो चरण प्रवेश गरिसकेका छन् भने एक टोलीको प्लेअफ सम्भावना बाँकी छ । 

कहाँ चुक्यो शरदको टोली पोखरा ? 
कमजोर ब्याटिङ– शरदको पोखरा पल्टन साविकको विजेता टोली हो ।  गत सिजन पोखराले चितवनलाई पराजित गर्दै उपाधि उचालेको थियो । 

साबिक विजेता तथा घरेलु टोलीको रुपमा पहिलो खेल खेलेको पोखराले उपाधि दाबेदारको रुपमा रहेको टोली काठमाडौं गोल्डेन्स वारियर्सलाई ९ विकेटको फराकिलो अन्तरले पराजित गर्दै नयाँ संस्करणको उपाधि दाबेदारको रुपमा आफूलाई पनि प्रस्तुत गरेको थियो । 

पहिलो खेलमा उत्कृष्ट प्रदर्शन गरेको पोखरा दोस्रो खेलमा बुटवल ब्लास्टर्ससँग ८ विकेटको फराकिलो अन्तरले पराजित भयो ।  पहिलो दिन जस्तो खेल भने पोखराले प्रदर्शन गर्न सकेन ।  दोस्रो खेलमा पोखराले झनै कमजोर प्रदर्शन गर्‍यो । टस हारेर चितवन राइनोजविरुद्ध पहिले ब्याटिङ गरेको पोखराले निर्धारित २० ओभरमा अल आउट हुँदै १०७ रन बनायो । 

उक्त रन चितवनले १४ ओभर ५ बलमा चार विकेट गुमाउँदै पूरा गर्याे ।  उक्त खेलमा ओपनरमा आएका कुशल भर्तेलले १० रन बनाएर आउट हुँदा त्यसपछिका दुई ब्याट्सम्यानले केही आशलाग्दो प्रदर्शन गरे पनि बाँकी पाँच ब्याट्सम्यान दोहोरो रन नबनाउँदै आउट भएका थिए । 

तेस्रो खेलमा बुटवलविरुद्ध टस हारेर पहिले ब्याटिङ गरेको पोखराले निर्धारित २० ओभरमा ५ विकेट गुमाउँदै १२१ रन बनाएको थियो । बुटवलले उक्त लक्ष्यलाई १४ ओभरमै पूरा गर्‍यो ।  पोखराको ओपनरमा आएका कुशल भुर्तेल तीन रनमा आउट हुँदा आक्रामक ब्याट्सम्यानको रुपमा रहेका विनोद भण्डारी ३ तथा कप्तान शरद ७ रनमा आउट भए । 

उता पोखराका लागि सर्वाधिक रन बनाएका रविइन्दर सिंहले ४२ बलमा मात्र ४५ रन बनाए ।  चौथो खेलमा पनि सहजै पराजित भयो । विराटनगर टाइटान्सले दिएको १४५ रनको लक्ष्य पछ्याएको पोखराले १९ ओभर ५ बलमा अल आउट हुँदै मात्र १०० रन बनायो । विराटनगरले पोखरालाई ४५ रनले पराजित गरेको थियो । यो खेलमा पोखराका तीन ब्याट्सम्यान रन नबनाइ आउट भएका थिए । 

पाँच ब्याट्सम्यानले दोहोरो रन बनाउन सकेनन् । यस खेलमा पनि पोखराको ब्याटिङ्मा कमजोरी देखियो । उक्त खेलमा विदेशी खेलाडीहरुले पनि दोहोरो रन बनाउन सकेका थिएनन् ।  अन्तिम खेलमा टस जिते पनि पोखराले धनगढीविरुद्ध प्रतियोगिताकै कमजोर प्रदर्शन गर्‍यो । पोखराले १६ ओभर ३ बलमा अल आउट हुँदै मात्र ७९ रन बनायो । 

उक्त योगफल धनगढीले ९ ओभर ४ बलमा ५ विकेट गुमाउँदै पूरा गर्‍यो ।  उक्त खेलमा पोखराका ९ ब्याट्सम्यानले दोहोरो रन जोड्न सकेनन् ।  विदेशी खेलाडीले पनि उत्कृष्ट प्रदर्शन गर्न सकेनन् ।  प्रतियोगितामा शरदको टोलीबाट कुशल भुर्तेल सबैभन्दा बढी रन बनाए ।  ५ खेल खेलेका अलराउन्डर कुशलले ५ खेलको ५ इनिङ्समा १०० रन बनाए । त्यस्तै कप्तान शरद भेषावकर ५ खेलको चार इनिङमा ५६ रनमा बनाए । 

म्यानेजमेन्टको र विदेशी खेलाडी अनुबन्धनमा कमजोरी 
व्यावसायिक प्रतियोगिताको रूपमा रहेका लिगमा पनि खेलाडी व्यवस्थापनमा कमजोरी देखियो । शरदको टोली पोखरा पल्टनका खेलाडीहरूले अन्तिम समयसम्म पनि आफ्नो सम्झौता गरेका थिएनन् । जसले गर्दा खेलाडीले आफू सुरक्षित महसुस गर्न सकेनन् । 

“अन्तिम समयसम्म पनि हाम्रो टिममा कुन खेलाडी खेल्ने भन्ने कुरा नै पूरा भएको थिएन । हालसम्म पनि खेलाडीले आपूmलाई सुरक्षित महसुस गरेका छैनन् । व्यावसायिक लिगमा टिमको व्यवस्थापन गर्नेले खेलाडीलाई राम्रो वातावरणमा खेल्न सक्ने बनाएमा भने खेलाडीहरूले उत्कृष्ट प्रदर्शन गर्नेछन्,” शरदले भने । शरदको टिममा आउने विदेशी खेलाडी पनि अन्तिम समयमा आउन सकेनन् ।

शरदको टोलीमा आउने भनेका खेलाडी अर्काे टोलीमा परे । मुम्बईका ओपनिङ ब्याट्सम्यान प्रयाग र यूएईका मोहम्मद नाभेद अन्तिम समयमा प्रक्रिया नमिल्दा पोखराको टिममा आउन सकेनन् । जसले गर्दा पोखरालाई उत्कृष्ट विदेशी खेलाडीको अभाव भयो । उसो त यो संस्कणमा विदेशी खेलाडीभन्दा नेपाली खेलाडीले उत्कृष्ट प्रदर्शन गर्दै आइरहेका छन् ।

“हामीले सोचे जस्तो विदेशी खेलाडी टिममा राख्न सकेनौं । टिममा उत्कृष्ट ब्याट्म्यानहरू आवश्यकता थियो । त्यसका लागि हामीले नयाँ खेलाडी अनुबन्ध गर्नुपर्ने भयो जो ड्रफ्टमा परेका थिएनन् । त्यसैले पूरै प्रतियोगितामा हाम्रो ब्याटिङमा कमजोरी देखियो,” शरदले भने ।