साहित्य

आईफा अवार्ड स्थगनपछि भारतमा हल्लीखल्लीः चीनको हातदेखि ऋतिक रोशन काण्ड समेतको चर्चा

बाह्रखरी बिहीबार, असार १९, २०७६

आईफा अवार्ड स्थगनपछि भारतमा हल्लीखल्लीः चीनको हातदेखि ऋतिक रोशन काण्ड समेतको चर्चा

काठमाडौं । भारतीय मिडियामा नेपालमा हुने भनिएको इण्डियन फिल्म एकेडेमी अवार्डस (आईफा)को कार्यक्रम रद्ध भएको प्रसंगले निकै चर्चा पाएको छ । आज प्रकाशित भारतीय सञ्चार माध्यममा यसबारेमा चर्चा भएको हो । भारतको बिजनेश स्ट्याण्डर्डले नेपालमा आलोचना भएपछि सरकारले कार्यक्रम स्थगित गरेको जनाएको छ ।
अनलाइन संस्करण स्वराज्यले प्रधानमन्त्री केपी शर्मा ओली र चीनका राष्ट्रपति सी जिनपिङको तस्बिर समेत राखेर सत्तारुढ दलका नेताले आलोचना गरेका कारण कार्यक्रम रद्ध भएको जनाइएको छ ।

बलिउड मेगा इभेन्टको रद्ध हुनुमा चीनको हात रहेको समेत सो समाचारमा जनाइएको छ । केपी ओली नेतृत्वको सरकारले भने सो कार्यक्रम गर्न चाहेको, त्यसको खर्च ४ मिलियन डलर लाग्ने अवस्था रहेको तर आलोचकहरुले यसलाई निकै महंगो मानेको समाचारमा जनाइएको छ ।
एक जना राप्रपाका नाम उल्लेख नगरिएका नेतालाई उद्धृत गर्दै चीन सो कार्यक्रमबाट एकदमै चिन्तित भएको भन्ने प्रसंग समेत जोडिएको छ ।

सन् २००१ मा नेपालमा ऋतिक रोशन काण्ड भएको जनाउँदै सो काण्डमा चीन नजिक मानिने माओवादीको हात भएको समेत समाचारमा जनाइएको छ ।

प्रो—चाइना इलिमेन्टले फेक न्यूज प्रवाह गरेर कार्यक्रमको आलोचना गरिएको समेत सो समाचारमा उल्लेख गरिएको छ । नेपालका विद्यालयहरुमा चिनियाँ भाषा मन्दारिनको अध्ययनको व्यवस्था गरिएको, नेपाली फिल्ममा चीनले लगानी गरेको र २० औं आईफा अवार्डको कार्यक्रममा भने चीनले नेपाललाई प्रभावित पारेकोले हुन नसकेको स्वराज्यले दाबी रहेको छ ।

यस्तै आउटलुक इण्डियाले पनि गएको मंगलबार संसदीय समितिले दिएको निर्देशन अनुसार सो कार्यक्रम रोकिएको जनाएको छ । समाचारमा भारतीय चलचित्रकर्मी आउँदा त्यसले नेपालको प्रवद्र्धनमा मद्यत पुग्ने भएपनि रोकिएको उल्लेख गरिएको छ । एएनआई न्यूजले पनि नेपाल पर्यटन बोर्डलाई उद्धृत गर्दै सो कार्यक्रम स्थगित गरिएको चर्चा गरिएको छ ।

भारतीय सञ्चारमाध्यममा प्रकाशित समाचार शीर्षक