काठमाडौं । बारा सिमराकी शर्मिला पाठकलाई लगातार टाउको दुख्ने समस्या देखियो । उनी उपचारका लागि नारायणी उपक्षेत्रीय अस्पताल विरगञ्ज गइन् । नारायणी उपक्षेत्रीय अस्पतालका चिकित्सकले उनलाई एक सातासम्मको टाउको दुख्न कम हुने औषधी दिए  । तर उक्त औषधी एक सातासम्म सेवन गर्दा पनि टाउको दुख्न निको भएन् । 

उनी पुन: सोही अस्पताल गइन् । चिकित्सकले टाउकाको सीटीस्क्यान गनुपर्ने बताए । उनको टाउको सीटीस्क्यान गत जेठ १५ गते नारायणी उपक्षेत्रीय अस्पतालमा नै भयो । तर टाउको के कारणले दुखेको हो भन्‍ने पत्ता लागेन् । उनलाई चिकित्सकले यहाँ एमआरआई मेसिन छैन् । तर एमआरआई गनुपर्ने देखिएको छ भनेर वीर अस्पताल रिफर गरिदिए ।

उनी वीर अस्पताल उपचारका लागि पुगिन् तर सेवा पाइनन् । “नारायणी अस्पतालले वीरमा रिफर गर्‍यो तर यहाँ मेसिन बिग्रेर थन्किएको एक महिना भएको रहेछ । पैसा भए त निजीमा गएर समयमा नै उपचार गर्नुहुन्‍थ्यो, पैसा छैन् । यहाँ आउँदा त समूहबाट ऋण झिकेर आएको,” उनले  बाह्रखरीसँग भनिन्, “वीर बन्द भए पनि त्रिवी शिक्षण अस्पताल (टिचिङ्) मा कतै पाइएला कि भन्ने आशाले एक महिनापछि मात्र पालो आउँछ भनेर पठाएका छन् । एक महिनासम्म दुखाई कम गर्ने औषधी सेवन गरेर बस्नुपर्ने उनले गुनासो गरिन् । 

एक महिनादेखि टाउको दुख्‍ने समस्यले सताएपछि धादिङ्की कमला पाख्रिन उपचारका लागि धार्केमा रहेको एक फार्मेसीमा पुगिन् । त्यहाँ एक साताको औषधी दिएर निको हुने बताए पछि घर फर्किन् । उक्त औषधीले दुखाई केही कम भए पनि फेरि टाउको दुख्‍न सुरु भएपछि पुन: छोरीका साथ त्यही फार्मेसीमा गइन् । फार्मेसी सञ्‍चालकले वीर अस्पतालमा गएर एमआरआई गर्न सुझाव दियो । फार्मेसी सञ्‍चाककै सुझावअनुसार उनी वीर अस्पताल आइन् । 

फार्मेसी सञ्चालकले वीर अस्पतालमा गएर टाउको एमआरआई गर्नु सबै समस्या पत्ता लाग्छ भनेर पठाएको कमलाले बताइन् । “फार्मेसी सञ्चालकले वीर अस्पतालमा टाउकोको सबै उपचार हुन्छ भनेर पठाए । तर वीर अस्पतालमा मेसिन बिग्रेर सेवा बन्द भएको एक महिना भएको रहेछ, ” कमलाले बाह्रखरीसँग भनिन् । निजी अस्पतालमा गएर भए पनि टाउको के कारणले दुखेको हो ? त्यो समस्या पत्ता लगाएर मात्र घर फर्कने उनले बताइन् ।

त्यसैगरी विभिन्न जिल्लाका अस्पतालहरुले एमआरआई गनुपर्ने बिरामीलाई वीर, त्रिवि शिक्षण अस्पतालमा रिफर गर्ने गर्छ । वीर अस्पतालमा उक्त सेवा बन्द भएको एक महिना भएको छ भने त्रिवि शिक्षण अस्तपतालमा १५ दिनदेखि १ महिनासम्म पालो कुर्नुपर्ने बाध्यता छ । 

एमआरआई सेवा सञ्चालन रहँदा दैनिक २० जनाले सेवा लिने गरेका थिए भने उक्त सेवा अस्पतालले सात हजारमा हुने गरेकोमा निजी अस्पतालहरुले २० हजारसम्म लिने गरेका छन् । वीरमा एमआरआई सेवा सञ्चालन हुँदा एक सातासम्म पालो आउथ्यो । 

सामान्यतया एक्सरे सीटीस्क्यानबाट पत्ता लगाउन नसकेका गम्भीर प्रकारका समस्याहरुको परीक्षणका लागि एमआरआई मेसिनको प्रयोग गरिन्छ । ब्रेन ट्युमर जोर्नीसम्बधी समस्या ढाड र मेरुदण्डसम्बन्धी समस्या, नसाका समस्या र गर्धनको नसा च्यापिएकोलगायतका समस्या देखिएमा एमआरआई मेसिनको प्रयोग गरिन्छ । 

अस्पतालका निर्देशक डा. केदार सेन्चुरीले एक महिनादेखि एमआरआई गर्ने मेसिन बिग्रदा बिरामीहरुलाई समस्या परेको बताए । “लामो समयदेखि पालो कुरेर बसेका बिरामीहरु मारमा परेका छन् । उक्त मेसिन बनाउने काम भइरहेको छ । अब छिटै सञ्चालनमा आउने छ,” उनले भने, “ट्रमा सेन्टरमा एमआरआई मेसिन नहुँदा त्यहाँका बिरामी पनि वीरमा नै आउने भएकोले बिरामीको चाप पनि अत्यधिक थियो ।”