काठमाडौं । नुवाकोटका ४५ वर्षीय राजेन्द्र बहादुरलाई गत चैतमा खाना अड्केर श्वासप्रश्वास समस्या आएर बेहोस भए । उनलाई तुरुन्तै आफन्तले एम्बुलेन्समा राखेर वीर अस्पताल लिएर आए । चिकित्सकले आईसीयूमा राखेर उपचार गनुपर्ने बताए र तर अस्पतालमा रहेका आईसियू बेड खाली नभएको अस्पतालको प्रशासनले जानकारी दियो । 

उनलाई तुरुन्तै अल्का अस्पताल जाउलाखेलमा उपचारका लागि लगिएको राजेन्द्रका छोरा नविन राजले बाह्रखरीसँग बताए । सरकारी अस्पतालमा 'न बेड पाइने न आईसियू', उनले आक्रोश मिश्रित स्वरमा भने, “सरकारी असपतालमा धनी र पहुँच भएकाले मात्र पाउने रहेछन् । हामीहरु जस्ता गरिबले होइन् रहेछ ।”

थानकोटका हरिप्रसाद पाठककी श्रीमति मिनाको रक्तचाप बढेपछि एक्कासी बेहोस भइन् । हरिप्रसाद श्रीमतिलाई एम्बुलेन्समा राखेर मिनभवनस्थित निजामति अस्पताल उपचारका लागि ल्याए । तर त्यहाँका चिकित्सकले आईसियू खालि नभएको जानकारी दिए ।

उनले तुरुन्तै सोही एम्बुलेन्समा राखेर वीर अस्पताल ल्याए । वीर अस्पतालमा पनि आईसीयूमा बेड खाली नभएको अस्पतालका कर्मचारीले बताए । उनले श्रीमतिलाई नर्भिक अस्पतालमा लगेर उपचार गरेको बताए । “आर्थिक अवस्था कमजोर छ, सरकारी अस्पतालमा आईसीयू बेड पाउन नि मुस्किल हुँदो रहेछ”, उनले बाह्रखरीसँग भने, “निजीमा त छिमेकीसँग मागेर ल्याएको ऋण कति दिन पुग्ला ?”

वीर अस्पतालमा दैनिक १५ देखि २० जना आईसीयू बेडका बिरामी आउने गरेको अस्पताल प्रशासनले जनाएको छ । तर स्थान अभाव र आईसीयू पर्याप्त नुहदाँ समस्या भएको अस्पताल प्रशासन स्वीकार गरेको छ । 

अस्पतालका एक कर्मचारीका अनुसार यहाँको आईसीयू बेड र भेन्टिलेटर पाउनु भनेको पहुँच भएकोले मात्र हो । कर्मचारी र नर्सिङ स्टाफहरु पटक-पटक बिग्रेर थन्किएका भेन्टिलेटर बनाउन प्रशासनमाभन्दा पनि अस्पताल प्रशासनले चासो नदिएको उनिहरुको गुनासो छ ।

अस्पतालमा हाल ११ वटा आईसियू बेड र ६ वटा भेन्टिलेटर रहेका छन् । तर उक्त भेन्टिलेटर र आईसीयू बेड हरेक दिन भरिएका हुन्छन् । अस्पतालमा नै शल्यक्रिया गरेका बिरामीलाई समेत चिकित्सकले बेड नपाएपछि आफू मातहतका अस्पतालमा पठाउने गरेको स्रोतको दाबी छ । अस्पतालका पाँचवटा भेन्टिलेटर मेसिन बिग्रेर ट्रमा सेन्टरको स्टोरमा थन्काएर राखिएका छन् ।
 
अस्पतालमा उपचारका क्रममा आईसीयू चाहिने बिरामी अन्य अस्पतालमा जानुपर्ने बाध्यता छ । वीरमा आईसीयू दुई देखि तीन हजार पर्छ भने अन्य निजी अस्पतालले सात हजारदेखि  १५ हजारसम्म लिने गरेका छन् ।

त्यस्तै, विश्व स्वास्थ्य संगठनको मापदण्डअनुसार कुल अस्पतालको बेडको १० प्रतिशत आईसीयू हुनुपर्ने उल्लेख छ । वीर अस्पतालमा ३८६ वटा बेड छन्  । सोही अनुपातमा करिब ३९ वटा आईसीयू बेड हुनु पर्ने हुन्छ ।  अस्पतालमा ११ वटा आईसीयू र ६ वटा  भेन्टिलेटर छन् । स्थान अभाव हुँदा समस्या भएको र अर्को बिग्रेको भेन्टिलेर पनि बनाइएका छैनन् ।

त्यसैगरी, २०७२ सालको भूकम्पले गर्दा स्थान अभाव हुँदा समस्या भएको अस्पतालका निर्देशक डा. केदार सेन्चुरीले बताए । उनले भने, “स्थान अभाव हुँदा सबै आईसीयू चाहिने बिरामीलाई सेवा दिन समस्या भएको हो । जाईकाको नयाँ भवन बनेपछि सेवा दिन सकिन्छ ।” 

फाइल तस्बिर