काठमाडौँ । नेपाल कम्युनिस्ट पार्टी (ने क पा)को सोमबारको बैठकमा तेस्रो वरियताको नेता माधव नेपाल र प्रवक्ता नारायणकाजी श्रेष्ठले ‘नोट अफ डिसेन्ट’ लेखेका छन् । नेता नेपालले असोज २२ गतेको सचिवालयको बैठकमा लिखित असन्तुष्टि दर्ता गरेका थिए ।

तर, सोमबारको बैठकले नेता नेपालको असन्तुष्टि सम्बोधन नगरी ५ असोजको सचिवालयको बैठकले प्रदेशको जिम्मेवारी बाँडफाँट गर्ने निर्णय नै सदर गरेपछि नेताद्वयले ‘नोट अफ डिसेन्ट’ लेखेको सचिवालयका एक नेताले बाह्रखरीलाई जानकारी दिएका छन् । प्रदेश कार्यविभाजनप्रति पवक्ता श्रेष्ठको पनि असन्तुष्टि थियो । त्यतिबेला लिखित असन्तुष्टि व्यक्त नगरेका श्रेष्ठले सोमबारको सचिवालयको बैठकमा नेता नेपाललाई साथ दिएका हुन् ।

नेता नेपालले लिखितरूपमा बुझाएको पत्रमा पार्टीका हरेक निर्णय सहमतिका आधारमा गरिनुपर्ने, पार्टीले यसअघि तय गरेको मापदण्डमै टेकेर एकव्यक्ति एक पद, जिम्मेवारी बाँडफाँट गरिनुपर्नेलगायतका विषय समाविष्ट थिए ।

नेता नेपालले आफू विदेश भएकाबेला २८ भदौमा बसेको सचिवालयको बैठकको मर्म, भावना लत्याएर प्रदेश इन्चार्ज, सहइन्चार्ज, अध्यक्ष र सचिव तोकिएको भन्दै असन्तुष्टि व्यक्ति गर्दै आएका छन् । भदौको अन्तिम साता (२८ भदौ)मा बसेको सचिवालयको बैठकले प्रदेश, जिल्ला तहको कमिटी एकीकरण गर्न नयाँ मापदण्ड, विधि तय गर्न प्रस्ताव तयार पार्ने जिम्मा अध्यक्षद्वयलाई जिम्मेवारी दिने निर्णय गरेको थियो ।

यसैबीच नेताद्वय नेपाल र श्रेष्ठले लेखेको ‘नोट अफ डिसेन्ट’लाई स्थायी कमिटीको बैठकमा छलफलका लागि प्रस्तुत गरिने समझदारी भएको सचिवालय स्रोतले जानकारी दियो ।
“नेता नेपाल र प्रवक्ता श्रेष्ठको ‘नोट अफ डिसेन्ट’लाई कात्तिक १३ र १४ गतेको स्थायी कमिटीको बैठकमा पनि प्रस्तुत गरिनेछ,” सचिवालयका नेताको भनाइ छ ।