काठमाडौं । ऊर्जाको ब्याकपअपको रूपमा रहेको कुलेखानी जलाशयमा पानीको सतह गत वर्षको भन्दा ८ मिटर कम भएको छ । 

कुलेखानी आसपास क्षेत्रमा पर्याप्त वर्षा नभएका कारण जलाशय नभरिएको हो । हाल जलाशयमा पानीको सतह १ हजार ५२२ मिटरभन्दा अलि बढी छ । कुलेखानी जलाशयको उचाइ १ हजार ५३० मिटर छ । जलाशय सञ्चालन नभएकाले पानी भरिने क्रम जारी रहेको नेपाल विद्युत् प्राधिकरण प्रणाली सञ्चालन विभाग प्रमुख विष्णु श्रेष्ठले बताए । 

दिनको ४ सेन्टिमिटरका दरले पानीको सतह बढ्दै गएको उनले जानकारी दिए । उपत्यकाको माग व्यवस्थापन गर्न कहिलेकाहीँ साँझ केही मिनेटमात्र विद्युत् गहृ सञ्चालन भएको उनले बताए । उनका अनुसार यही गतिमा बढेमा सतह १ हजार ५२४ मिटर पुग्नेछ । 

हाल विद्युत् माग १ हजार ३ सय मेगावाट र आपूर्ति ९ सय मेगावाट भइरहेको छ । अझै प्रणालीमा ४ सय मेगावाट अपुग भएको उनले बताए । माग र आपूर्तिको अवस्था हेर्दा मंसिरभर काठमाडौं उपत्यकामा लोडसेडिङ हुने सम्भावना नरहेको श्रेष्ठको भनाइ छ । त्यसपछि माग र आपूर्तिमा निर्भर रहने उनले जानकारी दिए । आपूर्ति घटेमा पुसदेखि लोडसेडिङ केही घण्टा हुने उनको अनुमान छ । 

सरकारले उपत्यकालाई लोडसेडिङमुक्त बनाउने हाल परीक्षण गरिरहेको जानकारी दिएको छ । आउँदो हिउँदमा लोडसेडिङ हटाउन भारतबाट ६ सय मेगावाटसम्म बिजुली आयतको तयारी भइरहेको छ । हाल भारतबाट ३ सय मेगावाट बिजुली आयात भइरहेको छ । ऊर्जामन्त्री जनार्दन शर्माले लोडसेडिङ न्यूनीकरण नभई मुक्त गर्न सरकार लागिपरेको बताएका छन् ।