काठमाडौं । जीएमई रेमिटबाट पठाएको रकम मेगा बैंकबाट देशैभरिबाट भुक्तानी गर्न पाइने भएको छ । मेगा बैंक नेपाल र जीएमई रेमिट प्राइभेट लिमिटेडबीच रेमिट्यान्स कारोबारसम्बन्धि सम्झौता भएको हो ।
सम्झौतामा मेगा बैंकका तर्फबाट निमित्त प्रमुख कार्यकारी अधिकृत रविना देशराज श्रेष्ठ र जीएमई रेमिटका तर्फबाट प्रबन्ध निर्देशक दिवाकर पौडेलले शुक्रबार रेमिट्यान्स कारोबार सम्बन्धी सम्झौता पत्रमा हस्ताक्षर गरे । यो सम्झौतापछि जीएमई रेमिटमार्फत् नेपालीले स्वदेश तथा विदेशबाट पठाएको विप्रेषण रकम मेगा बैंकका देशभरका शाखाबाट भुक्तानी पाउने छन् ।
जीएमई रेमिटसँगको साझेदारीपछि विशेषगरि दक्षिण कोरिया, अमेरिका, बेलायत, जापान, मलेसिया, युरोपबाट रेमिट्यान्स कारोबार सहज हुने मेगा बैंकको विश्वास छ । यसैगरी, जीएमई रेमीट मेगा बैंकको सुपर एजेन्ट पनि भएका कारण मेगा रेमिटबाट पठाएको रकम जीएमईका देशभरका ७ हजार भन्दा बढी एजेन्टबाट भुक्तानी लिन सकिने बताइएको छ ।
मेगा बैंकको देशभर ९१ वटा शाखा कार्यालय तथा देशभरि छरिएका १९ सय भन्दा बढी मेगा रेमिट एजेन्ट छन् ।