काठमाडौं । विभागीय टोली त्रिभुवन आर्मी क्लबले तेस्रो संस्करणको रमपम झापा गोल्डकप फुटबलको उपाधि जितेको छ । सोमबार भएको फाइनलमा घरेलु टोली झापा ११ लाई सडन डेथमा ८ – ७ ले हराउदै आर्मीले उपाधि जितेको हो ।

योसँगै आर्मीले बर्षको सातौं उपाधि जित्न सफल भयो ।उपाधिसँगै झापाले १२ लाख ५१ हजार प्राप्त गरेको छ । उपविजेता बनेको झापाले ६ लाखमा चित्त बुझायो । प्रतियोगितामा झापाका योगेश गुरुङ मोस्ट भ्यालुएबल खेलाडी बन्दै यामाहा मोटरसाइकल प्राप्त गरे ।

बिर्तामोडस्थित डोमलाल रंगशालामा निर्धारित ९० मिनेट र थप गरिएको समयमा १ – १ गोलको बराबरीमा सकिएपछि खेल पेनाल्टी सुटआउटमा गएको थियो । पेनाल्टी सुटआउटमा ३ – ३ गोलको बराबरी भएपछि खेल सडन डेथमा गएको थियो ।

पेनाल्टी सुट आउटमा आर्मीका नवयुग श्रेष्ठ, दिपक गुरुङ र विकेश कुथुले गोल गरे । तर जितेन्द्र कार्की र सन्तोष तामाङको प्रहार झापाका किपर किशोर गिरीले बचाएका थिए । झापाका कर्ण लिम्बुको प्रहार आर्मीका किपर विकेशले बचाउदा सुमिन मैनालीले पोस्ट बाहिर प्रहार गरेका थिए । तर, भुषण लिम्बु, कप्तान योगेश गुरुङ र देवेन्द्र तामाङले गोल गर्दै झापालाई सडन डेथसम्मको यात्रा तय गराए ।

तर, सडन डेथमा झापाका किपर किशोर गिरीको प्रहार आर्मीका किपर विकेश कुथुले बचाएपछि आर्मीले सातौं उपाधि जितेको हो । सडन डेथमा आर्मीका दिप लामा, विकास तामाङ, भरत खवास, सुमन अर्याल र टंक बस्नेतले गोल गरे । झापाका विश्वास श्रेष्ठ, पुजन उपरकोटी, विकास बुढाथोकी र दिलेन लोक्तानले गोल गरेका थिए ।

त्यसअघि खेलको पहिलो हाफ गोलरहित बराबरीमा सकिएको खेलको दोस्रो हाफमा झापाले सुरुवाती अग्रता लिएको थियो ।  खेलको ४९ औं मिनेटमा कर्ण लिम्बुले गोल गर्दै झापालाई अग्रता दिलाए । तर, खेलको ७८ औं मिनेटमा भरत खवासले गोल गर्दै खेल १ – १ गोलको बराबरीमा ल्याएका थिए ।