एजेन्सी । म्यानचेस्टर सिटीले इंग्लिश फुटबल लिग कप (काराबाओ) कप फुटबलको उपाधि जितेको छ । आइतबार राति भएको फाइनलमा आर्सनललाई ३–० ले हराउँदै काराबाओ कपको उपाधि जितेको हो ।

सिटीलाई उपाधि दिलाउन सर्जियो अग्युरो, भिसेन्ट कोम्पानी र डेभिड सिल्भाले समान एक एक गोल गरे । योसँगै सिटीले सिजनको पहिलो उपाधि जितेको छ । प्रिमियर लिगको उपाधि होड बलियो बनाएको सिटीले यो पाँचौ पटक काराबाओ कपको उपाधि जितेको हो । सिटी आएपछि प्रशिक्षक पेपे ग्वार्डीवलाको यो पहिलो उपाधि हो । 

वेम्बलीमा भएको फाइनलमा सिटीले खेलको १३ औं मिनेटमा अग्युरोको गोलबाट सुरुवाती अग्रता बनाएको थियो । पहिलो हाफमा १ – ० ले अघि रहेको सिटीले दोस्रो हाफमा थप दुई गोल गर्यो ।

खेलको ५८ औं मिनेटमा कम्पोनीले गोल गर्दै सिटीलाई २ – ० को अग्रता दिलाए । त्यसपछि खेलको ६५ औं मिनेटमा सिल्भाले गोल गरेपछि सिटीले ३ – ० को जित निकाल्दै सिजनको पहिलो उपाधि घर भित्रायो ।

यता, आर्सनलले केहि गोलको अवसर खेर फाल्दा फाइनलमा सिटीलाई नतिजा सुम्पन बाध्य भएको हो । आर्सनलले सिटीविरुद्ध गोल गर्ने ३ पटक उत्कृष्ट प्रयास गरेको थियो । तर, आर्सनल त्यसमा सफल हुन् सकेन र फाइनलमा पराजित हुन् पुग्यो । योसँगै काराबाओ कपको ८ औं पटक फाइनल पुगेको आर्सनल फाइनलमा छैटौं पटक पराजित भएको हो ।