काठमाडौं । नेपाल टेलिकमले नयाँ सोधपुछ तथा ग्राहक सेवा केन्द्र सञ्चालनमा ल्याइएको छ । सूचना तथा सञ्चार राज्यमन्त्री तप्तबहादुर बिष्टले काठमाडौंमा कार्यक्रमबीच उक्त सेवा केन्द्रको शुभारम्भ गरेका थिए । 

कार्यक्रममा राज्यमन्त्री बिष्टले टेलिकमको सेवाप्रति नेपाली जनता पूर्णरूपमा विश्वस्त भएतापनि ग्राहकसँग निरन्तर नजिक हुनका लागि सोधपुछ तथा ग्राहक सेवा केन्द्रले थप सहयोग पु¥याउने विश्वास ब्यक्त गरे । समय सापेक्ष नयाँ प्रविधि भित्र्याए ग्राहकहरू समेत सन्तुष्ट हुने उनको भनाइ थियो । 

त्यस्तै मन्त्रालयका सचिव महेन्द्रमान गुरुङले टेलिकमका सामु भएका विविध चुनौतीहरुलाई अवसरमा बदल्न ग्राहकको गुनासोलाई सम्बोधन गर्न केन्द्रले सहयोग पुर्‍याउने बताए । 

ग्राहकका जिज्ञासा तथा गुनासालाई समयमै सम्बोधन गर्न र कम्पनीलाई ग्राहकप्रति उत्तरदायी बनाइ राख्नका लागि सो सेवा केन्द्र महत्वपूर्ण हुने कम्पनीको भनाइ छ । 
यस प्रकारको सेवा पहिलेदेखि नै सञ्चालनमा आए पनि अहिले नयाँ व्यवस्थापनमा सञ्चालन ल्याएको जनाइएको छ । 

टेलिकमका अनुसार १९७ मार्फत हुने सोधपुछ सेवा नयाँ संरचनाबाट सञ्चालनमा ल्याइएको हो । वायरलाइन ग्राहक सेवाका लागि १९८ र ‘जीएसएम’ तथा ‘सीडीएमए’ मोबाइल ग्राहक सेवाका लागि १४९८ नम्बरमा डायल गरी उक्त सेवा ग्राहकहरुले लिन सक्नेछन् । सेवामार्फत टेलिकम सम्बन्धी गुनासा, जिज्ञासा तथा आवश्यक जानकारी लिन ग्राहकहरूले सक्नेछन् । सेवा निःशुल्क उपलब्ध हुने बताइएको छ । 

हालसम्म टेलिफोनबाट मात्र सेवाहरु दिइरहेकोमा उक्त सेवा केन्द्रबाट छिट्टै नै एसएमएस, इमेल तथा वेब च्याट सेवाको माध्यमबाट समेत सोधपुछ तथा ग्राहक सेवा उपलब्ध गराउने तयारी भइरहेको कम्पनीले जानकारी दिएको छ ।