काठमाडौं । पछिल्लो समय टिन एजका बालबालिका र जागिरे व्यक्तिमा विभिन्न तनावले टाउको दुख्ने गरेको पाइएको छ । धेरै घण्टासम्म ड्युटी गर्ने व्यक्तिमा तनावज्य टाउको दुखाई बढी देखिएको विशेषज्ञहरू बताउँछन् । 

नसा तथा मानसिक रोग विशेषज्ञ डा. प्रदीप पाण्डे वर्कप्लेस टक्सिक इन्भारमेन्टले मानसिक तनावजन्य रोग निम्त्याएर अप्रिय घटनासमेत भइरहेको बताउँछन् । उनका अनुसार कार्यास्थलको कामको बोझ र वातावरण वर्कप्लेस टक्सिक इन्भारमेन्ट हो । यस्तो वातावरणमा काम गर्ने व्यक्तिमा एन्जाइटी, टेन्सन हेडेक बढी हुन्छ । 

कार्यस्थलको कामको लोडलाई धान्न नसक्दा कतिपय अप्रिय घटनासम्म भएका छन् । डा. पाण्डेका अनुसार सामान्यतः विकसित मुलुकमा ६ देखि ८ घण्टाभन्दा बढी ड्युटी आवर हुँदैन । यही ड्युटी आवर भएका मुलुक नै खुसी राष्ट्रको सूचकांकमा अगाडि छन् । मानसिक स्वास्थ्य समस्या पनि ती देशमा कम छ । 

कतिपय अवस्थामा व्यक्तिको कामप्रतिको मोह, क्षमता आदिले पनि खुसी र सन्तुष्टि निर्धारण गर्ने उनको भनाइ छ । तर, सबैलाई एउटै वर्गमा राखेर कामको अधिक लोड दिनु उचित नहुने उनको धारणा छ । 

तोकिएको अवधिसम्म काम गर्न सहज छ की छैन, उसको क्षमता कति हो ? मानसिक अवस्था कस्तो छ भन्ने रोजगारदाताले विचार गर्र्नु आवश्यक हुने उनको भनाइ छ ।  

“व्यक्तिलाई १२ घण्टा ड्युटी गराउनुभन्दा ८ घण्टामा दिएको कामको गुणस्तर राम्रो हुन्छ । यो रिसर्चले पुष्टी गरेको तथ्य हो,” उनी भन्छन्, “थोरै समयमा उत्पादकत्व बढी हुन्छ । निश्चित समयमा ब्रेन थाक्छ र कामको गुणस्तरमा ह्रास आउँछ ।”

ड्युटी गरिरहने व्यक्तिको काममा प्रेम र लगाव कति छ ? त्यसमा विचार गर्नुपर्ने उनी बताउँछन् । पैसाको लागि मात्रै काम गर्नेभन्दा भित्रैदेखि इच्छा राखेर काम गरे त्यो तनावमुक्त हुनसक्ने उनको धारणा छ । 

यसबाहेक कार्यस्थलको वातावरण र आफ्नो शारीरिक र मानसिक स्वास्थ्यको ख्याल राख्नुपर्नेमा उनको जोड छ ।