काठमाडौं । सैलुङ तेक्वान्दो डोजाङको आयोजनामा हुने प्रथम सैलुङ भर्चुअल तेक्वान्दो राष्ट्रिय पुम्से प्रतियोगिताको तयारी पूरा भएको छ । प्रतियोगिता यही जनवरी ८ तारिखदेखि सुरु हुँदैछ ।

प्रतियोगितामा नेपालमा भएको १३औं दक्षिण एसियाली खेलकुद (साग)का स्वर्णपदक विजेता पार्वती गुरुङ, कमल श्रेष्ठ, जितबहादुर बोट, सुशीला राईलगायत २०० खेलाडीको सहभागिता रहने छ । त्यसमा १२० पुरुष र ८० महिला खेलाडी रहेको आयोजक डोजाङका प्रमुख नोर्बु मोक्तानले जनाएका छन् ।

पुरुष/महिलामा समान सात-सात गरी १४ स्पर्धामा प्रतिस्पर्धा हुनेछ । पुरुष/महिला दुवैमा १० वर्ष, १२ वर्ष, १५ वर्ष, १७ वर्ष, १८–३० वर्ष, ३१–४० वर्ष र ४१ वर्षमाथि उमेर समूहमा खेलाडीले आ–आफ्नो कौशल प्रदर्शन गर्नेछन् ।

प्रतियोगिताको सम्पूर्ण खर्च सैलुङ गाउँपालिकाले व्यहोर्ने डोजाङ प्रमुख मोक्तानले जानकारी  दिए ।

सहभागीले बढीमा एक मिनेट ३० सेकेन्डको भिडियो आयोजकलाई पठाउनुपर्ने प्रावधान छ । आज (जनवरी ६) बुधबार भिडियो पठाउनुपर्ने अन्तिम दिन हो ।

‘मोस्ट पपुलर खेलाडी’ लाई नगद १० हजार रुपैयाँबाट पुरस्कृत गरिनेछ । यो विधा चयनका लागि सहभागीले पठाएको भिडियोलाई युट्युबमा राखिनेछ । सर्वाधिक हेरिएको खेलाडीको भिडियोलाई उक्त विधाबाट पुरस्कृत गरिनेछ ।

फाइल तस्बिर ।