काठमाडौं । नेपाल बैंक लिमिटेड र नीलकण्ठ नगरपालिकाबीच मेयर विकास उद्यमशीलता कार्यक्रमअन्तर्गत व्याज अनुदान तथा सहुलियत ऋण प्रवाहसम्बन्धी सम्झौतामा हस्ताक्षर भएको छ । 

धादिङ सदरमुकाम धादिङवेशीमा आयोजित एक समारोहमा सम्झौता पत्रमा नीलकण्ठ नगरपालिकाको तर्फबाट प्रमुख भिमप्रसाद ढुंगाना र नेपाल बैँकका तर्फबाट बैंकका  बागमति प्रदेश प्रमुख सुन्दर पन्थीले हस्ताक्षर गरे ।

सम्झौता अनुसार चालु आर्थिक वर्षमा २ सय ८० जना उद्यमीले प्रत्यक्ष लाभ लिनेछन् । सम्झौता लागु भएसँगै उद्यामीहरुले नगरपालिकाको सिफारिसमा नेपाल बैंकबाट कर्जा प्राप्त गर्नेछन । 
उक्त कर्जामा उद्यमीहरुले व्याजमा अनुदान पाउनेछन् । यस प्रकार असल ऋणीहरुमध्येबाट महिलाले ६ प्रतिशत र पुरुषले ५ प्रतिशत अनुदान प्राप्त गर्नेछन । बैंकले यो कर्जा  प्रवाह गर्दा सेवा शुल्क लिनेछैन । 

सम्झौता तथा घोषणा सभामा नेपाल बैँकका अध्यक्ष वासुदेव अधिकारीले नगरपालिकासँग सहकार्य गर्न पाएकोमा खुशी व्यक्त गर्दैै यस कार्यक्रमबाट किसानहरूले सहुलियतपूर्ण कर्जा सुविधा पाउने र नगरपालिकाबाट थप ब्याज अनुदान पाउने बताए । 

नीलकण्ठ नगरपालिकाका प्रमुख भिमप्रसाद ढुंगानाले नेपाल बैंकमार्फत मेयर विकास उद्यमशिलता कार्यक्रम सञ्चालन गर्न पाउनु गौरवको विषय रहेको बताएको प्रवक्ता प्रकाशकुमार अधिकारीले बताए ।