काठमाडौं । बुधबार धितोपत्र बजारमा नेप्से परिसूचकमा उच्च गिरावट आएको छ । साताको चौथो दिन सेयर बजार ६८ अंकले घटेको हो ।

बुधबार नै अर्थमन्त्रीमा डा. युवराज खतिवडालाई नयाँ कार्यकालका लागि नियुक्त गरिएको थियो । ४ बजे शपथ ग्रहण गर्नुपूर्व सेयर बजारले उनलाई खुसीसाथ स्वागत नगरेको देखिन्छ । खतिवडालाई सेयर लगानीकर्ताले बजारप्रति नकारात्मक मान्दै आएका छन् ।

बुधबार नेप्से परिसूचकमा पहिरो नै जाँदा कारोबारमा आएका सबै समूहगत उपसूचक ओरालो लागे । नेप्से घटेको दिन बैंकिङ, बिमा, लघुवित्त, होटललगायत समूहमा ठूलो अंकको गिरावट आयो ।
आज कारोबारमा आएका १ सय ७४ कम्पनीमध्ये मात्र ९ वटा कम्पनीको सेयर मूल्य बढेको छ ।

नेप्से ६८ दशमलब ४७ अंकले घटेर १४ सय ४१ दशमलब २० अंकमा कायम भएको छ । परिसूचकमा ४ दशमलब ५४ प्रतिशतले घट्दा कारोबार रकममा पनि निकै कमी आयो ।

यसदिन बजारमा २ अर्ब ९० करोड रुपैयाँको मात्र कारोबार भएको छ । पछिल्लो समय ४ अर्बभन्दा माथिको सेयर कारोबार हुने गरेकोमा यसदिन लगानीकर्ताको सोही चाप देखिएन । यसक्रममा ६७ लाख कित्ता सेयर किनबेच भएका छन् ।

कारोबार सुरु भएदेखि नै घट्न थालेको सेयर बजारमा साढे १ बजेदेखि बढ्न प्रयास गरेको भए पनि त्यो कायम हुन सकेन ।

नेप्से परिसूचकमा पहिरो आउँदा बैंकहरूको सेयर कारोबारमा चाप परेको छ । सर्वाधिक सेयर कारोबार हुने शीर्ष १० मा ६ वटा बैंक अटाए । तर, नेपाल लाइफ इन्स्योरेन्स कम्पनीको सर्वाधिक २६ करोड ६२ लाख रुपैयाँको सेयर किनेबेच भएको छ ।

नेप्से घटेको दिन सामुदायिक लघुवित्तको सेयर मूल्य सर्वाधिक ५ दशमलब १७ प्रतिशतले बढेको छ । यसदिन चारवटा कम्पनीको सेयर मूल्य घट्ने क्रममा सर्किट लागेको छ । नेसनल माइक्रोफाइनान्स, नेपाल सेवा लघुवित्त, स्वदेशी लघुवित्त र कालीका माइक्रोक्रेडिट विकास बैंकको सेयर मूल्य १० प्रतिशतले घटेको हो । यसदिन अरु ११ कम्पनीको सेयर मूल्य करिब १० प्रतिशतले घटेका छन् ।